De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 410,001 Auteur: Raimon de Tors Genre: Sirventes Numero: CXLVII

Amics Gauselm, si annatz en Toscana

I	1	Amics Gauselm, si annatz en Toscana,
		Aturatz vos en la ciutat certana
		Dels Florentis, c’om apella Florensa,
		Quar es mantenensa
	5	De vera valensa,
		E meilhura e gensa
		Joi e chant e amor,
		Ab francha captenensa
		E ab nobla ricor
	10	D’onor
		Vera, ses failhensa;
		Per q’ab seinhal de flor
		Secor
		Sos pres, ses temensa,
	15	E sa valen valor.
II		Si lai voles aver en sovinensa
		Los valenz faz c’om sol far en Proensa,
		D’En Barnabo acaptatz s’amistansa;
		Qar non l’a engansa
	20	De valor ni d’onransa:
		Tan gen lai s’enansa
		Denan los plus valenz,
		Q’en Proensa e en Fransa
		Seria avinentz,
	25	Plazenz
		Elarcs, ses duptansa,
		E pros e conoissenz;
		Qar senz,
		Mezura e bobansa
	30	Es sos captenementz.
III		E, si voles annar ab alegransa,
		Lo viage ajas en remembransa
		Qe fes Tedals al ric, cui Dieus manteinha;
		Qar el mon non reinha
	35	Uns a cui mais deveinha
		Qe de tan lueinh vienha
		A penre joi e chan.
		Ben i fos entreseinha
		De valen cors prezan!
	40	Qe man
		Son cui Amors deinha
		Qe tan riccor non han;
		Jogan,
		Sol qeus en soveinha
	45	N’ires e deportan.
IV		Prec vos qeus soveinha
		E qeus estei denan,
		Chantan,
		Amors, qeus manteinha
	50	Ab solaz e chan;
		Qe dan
		No crei nus hom preinha,
		Pueis d’aqella ora enan.
V		Anblan,
	55	Roncin qeus sosteinha
		Aures, bai o ferran,
		Ab tan
		D’arnes qol coveinha,
		D’En Bernabo prezan.
VI	60	Pueis, qant aures qeus coveinha,
		Trazes vostre prez enan.