De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 410,002 Auteur: Raimon de Tors Genre: Sirventes Numero: CLVIII

Ar es ben dretz 

I	1	Ar es ben dretz
		Qe vailha mos chantars
		E mos bos sens e mos sotils trobars,
		Pos lo Coms d’Anjou s’aficha
	5	En l’emperial deman;
		Per cui gerras e masan
		Seran, e plai e trafec;
		Mas, car es seinher e sers
		D’Amor, m’es grieus ez avers.
II	10	Tant es adretz
		D’amor, qel tornejars
		Ll’en es plasens, e dous lo guerrejars;
		Per qe mer mal s’om lo tricha;
		Mas qi m’en crezes d’aitan,
	15	Clerge n’agran tot l’afan;
		Qar, en aqest mezeis plec,
		Tan fag dui valen i an pers,
		Per q’ar ai paor del ters.
III		De totz clergetz
	20	M’es grieus lurs sejornars,
		E plagram fort qel sejorns fos amars,
		E s’agessan mala dicha
		Cill qez an legor trop gran;
		No m’o prezeri’un gan
	25	Qar tot furan de Clumnec
		O autre clerc o convers;
		Qar van al bon Rei travers.
IV		Qar es eletz
		Sobre totz e ses pars
	30	Lo reis Manfreis, a cui non platz trichars,
		Per cui Poilha es auta e richa,
		E Cecili’ atretan,
		E Calabria qel blan,
		El Premcipatz ses tot dec,
	35	Fins e dretz, ses tot envers,
		Li prec qes gart dels pervers.
V		Pos fins e netz
		Es en totz sos afars
		Lo Reis, qe fo primceps nobles e cars,
	40	Contra cui estai africha
		Clergia plena d’enjan,
		Lonbar neis e Alaman,
		En cui si pieu e si plec,
		Faran colps pesans e fers
	45	Ab lui de fustz e de fers.
VI		Se cil cui Proenza blan
		Cre la clerzia d’aitan
		Con lo coms Richartz crezec
		El Reis Castellans emers,
	50	Encar ai paor del ters.
VII		Al Rei de Cecili’ an
		Mos sirventes dir aitan:
		Q’ar paresca, s’anc parec,
		Sos grantz poders, braus e fers;
	55	Q’ar luecs es, o ieu sui gers!
VIII		Fals clerge e fals convers
		M’estan inz el cor travers.