De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 461,234 Auteur: Anonyme Genre: Planh Numero: CLXIV

Totas honors e tuig faig benestan 

I	1	Totas honors e tuig faig benestan
		Foron gastat e delit e malmes
		Lo jorn qe Mortz aucis lo mielz presan
		El plus plasen q’anc mais nasques de maire,
	5	Lo valen rei Manfrei, que capdelaire
		Fon de valor, de gaug, de totz los bes;
		Non sai cossi Mortz aucir lo pogues.
		Ai, Mortz crudels, cum lo volguist aucir,
		Quar en sa mort ve hom totz bes morir?
II	10	Qu’era s’en vai Honors sola ploran,
		Que non es hom qu’ab se l’apel ni res,
		Coms ni marques ni reis qes foss’enan
		Ni la semo que venga a lor repaire;
		Er’a faig Desenors tot qu’anc volc faire,
	15	Qu’a forostada Honor de son paes
		E i son cregut Enjan tan e No-fes
		Qu’an revirat vas totas partz lor gir,
		Q’a pena sai on posc’om pros gandir.
III		Ar vai son dol Larguesa demenan,
	20	Disen als cavaliers paubres cortes:
		«Seignor, e que fairem deserenan,
		Pos toutz nos es tan bos seigner e paire?
		Per Deu, non sai oimais qe dejam faire!
		Conseillatz nos qu’anem al Rei Frances
	25	O al pro N’Adoart rei dels Angles?
		E, si i anam, volran nos acuillir?
		Gran paor ai qe lor cara nos vir!»
IV		Enseignamenz e Valors qe faran?
		On troberan manteing, pos vos no i es,
	30	Seigner onratz, qels trasiatz enan?
		Toz temps iran ab dol ez ab maltraire,
		Pos vos no i es, q’eras sos emperaire
		E seigner sobre tot qu’anc fon ni es;
		No sai ons n’an, qar tan lor es mal pres,
	35	No pogran mais anar tan ne venir,
		Qu’anc mais troben tan plaisen acuillir.
V		Dreitz e Vertatz e Vergoigna s’en van:
		Mensonja e Tortz vergoignatz de marves
		Remanon sai; mas trop mal canje fan
	40	Nostre baron major, al mieu viaire,
		Que i vei troblar terra e foc, mar ez aire;
		Quar regna Falsetatz, e Bonafes
		S’en vai de cors; ez on la trobares?
		Prince baron, mout v’en degratz marir,
	45	S’al cor aves talen de ben finir.
VI		Part totz los monz voill q’an mon sirventes
		E part totas las mars, si ja pogues
		Home trobar queil saubes novas dir
		Del rei Artus e quan deu revenir.
VII	50	Ai, Cobeitatz! Vos e vostres arnes
		Confonda Deus, e totz vostres conres,
		Qu’aves juvent gastat e faig delir
		Deport e jai, ab vostre fals desir!