De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 007,001 Auteur: Aicart del Fossat Genre: Sirventes Numero: CLXVIII

Entre dos reis vei mogut et enpres 

I	1	Entre dos reis vei mogut et enpres
		Un novel plait c’adutz guerr’e mesclaigna,
		Costas d’aver e trebaill, com que peis,
		Bruit e resson et esfortz e compaigna;
	5	Car Conratz ven, qu’es mogutz d’Alamaigna,
		E vol cobrar, ses libel dat ni pres,
		So qu’a conquis Carles sobrels Poilles;
		Mas non er faitz que fer e fust non fraingna
		E caps e bratz, enanz quel plaitz remaigna.
II	10	Qu’en breu veirem descargar rics arneis,
		Tendas e traps fermatz per la campaigna,
		E mainz baros conseillar pels defes,
		Per que l’afars s’enanz’e no s’afraigna;
		Aissi veirem de mainta terra estraigna
	15	Venir faiditz soudadiers e borges
		E messatgiers, e privatz e pales,
		Et en la ost veirem solatz e laigna,
		Els berroviers soven correr la plaigna.
III		Trombas, tabors, sonaills, genz e peitrals,
	20	E cavalliers encoratz de contendre
		Veirem en cham, e penons e seignals
		E rencs d’armas ajostatz escoissendre,
		E mains cairels desclavar e destendre,
		E critz e plors e braitz e dols corals
	25	Poirem auzir, e per plans e per vals,
		E mains destriers pres ses dar e ses vendre,
		Els reis intrar en l’estor ses atendre.
IV		Lai on seran las seigneiras reials,
		Veirem escutz et elms macar e fendre,
	30	Trencar ausberc, e sentir colps mortals,
		E troncs e lans, e ferir e defendre;
		E, s’al plus fort camp intrara per pendre,
		Aqui veirem derrocar mainz vassals,
		E mainz jazer envers sotz los cavals,
	35	Manz mortz, manz pres, e manz per terr’estendre,
		E mainz aucir que no se volra rendre.
V		L’Aigla, la Flors a dreitz tant comunals
		Que no i val leis ne i ten dan decretals;
		Per que iran el camp lo plait contendre,
	40	E lai er sors qui meilis sabra defendre.