De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 319,001 Auteur: Paulet de Marseilla Genre: Sirventes Numero: CLXX

Ab marrimen et ab mala sabensa 

I	1	Ab marrimen et ab mala sabensa
		Vuelh er chantar, si tot chans no m’agensa,
		Quar valors a preza gran dechazensa
		E paratges es mermatz en Proensa,
	5	Et ai enic
		Mon cor per la preizo del pros N’Enric.
II		Ben deu esser marrida tota Espanha,
		E Roma tanh e cove be que planha
		Lo Senador franc e de bella companha,
	10	Lo plus ardit de Burc tro en Alamanha.
		A, trop falhic
		Quascus qu’el camp laisset lo pros N’Enric!
III		Tug l’Espanhol, del Gronh tro Compostelha,
		Devon planher la preizo, que ges belha
	15	Non fo ni es, d’En Enric de Castelha;
		El reis N’Anfos, que tant gent se capdelha
		Ab sen antic,
		Deu demandar tost son fraire N’Enric.
IV		Alaman flac, volpilh, de frevol malha,
	20	Ja lo vers Dieus nous ajut ni vos valha,
		Quar a N’Enric falhistz a la batalha;
		Aunid’avetz Alamanha ses falha,
		Malvatz mendic,
		Quar sol laissetz el camp lo pros N’Enric!
V	25	Que per valor e per noble coratge
		Mantenia N’Enricx l’onrat linhatge
		De Colradi ab honrat vassalatge;
		El reis N’Anfos, ab son noble barnatge,
		Quez al cor ric,
	30	Deu demandar tost son fraire N’Enric.
VI		No tanh a rei, quez a tan ric coratge
		Quoi reis N’Anfos, e tan noble barnatge,
		Lais estar pres home de son linhatge;
		Doncs, elh nos tric
	35	Que no deman tost son fraire N’Enric.
VII		Recrezensa faran e volpilhatge
		Tug l’Espanhol, silh que son de paratge,
		Si ’n breu de temps no fan tal vassallatge
		Don sion ric,
	40	E paupre silh que tenon pres N’Enric.