De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 248,079 Auteur: Guiraut Riquier Genre: Vers Numero: CLXXIX

S’ieu ja trobat non agues 

I	1	S’ieu ja trobat non agues
		Tantas de bonas razos,
		Auch en cort del rey N’Anfos
		Qu’er saubra trobar; som pes;
	5	Donc, pus sabers m’en es guitz,
		Si tot chans non es grazitz
		Ni socors non ai d’amor,
		Al bon Rey tanh tan d’onor
		Que dey, si puesc, bon vers far.
II	10	El bon Rey a tans de bes
		Que grazitz es sos ressos,
		Et laus tan grans e tan bos
		Quel mielhs del mon l’a perpres;
		Quar tant l’es pretz abelhitz
	15	Que saber e faitz e ditz
		E cor e sen e ricor
		A tot donat a valor;
		E si vers es, assatz par.
III		Qu’er aug qu’elh el Rey Frances,
	20	Don cujav’esser tensos,
		Veyrem acordar ambdos;
		Quel princeps, que senhers es
		Dels Proensals, n’es ausitz
		E crey qu’en er obezitz,
	25	Quar dreytz e patz l’an sabor;
		E par qu’, ab nostre Senhor,
		O pot tot leu endressar.
IV		Plazer deu al Rey Engles
		Lurs acortz, quar sospeyssos
	30	No l’an; e plagram que y fos
		Elh el Reys Aragones,
		Qu’ab valor s’es enantitz;
		Q’usquecx deu esser aizitz
		De voler l’acort de lor;
	35	El Reys N’Anfos per vigor
		Poira Granada levar.
V		Bem play quar l’onratz Marques
		De Monferrat cabalos
		Al Rey fa prezent joyos;
	40	Mas ans de luy tal lo pres
		Ques n’es d’onor enantitz
		E de poder afortitz;
		Don devon aver temor
		Sey enemic, qu’ab dolor
	45	Los fassa breument estar.
VI		Tug aquist fag me son guitz
		D’est vers far, tant vey aizitz
		Christias del Salvador:
		Servir sol van per s’amor
	50	La Sancta Terra cobrar.
VII		Bos reys N’Anfos, mout auzitz
		Es vostres laus; mas cumplitz
		No fon per lunh lauzador,
		Anz prendon tug mais d’onor
	55	Que vos el vostre lauzar.