De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 248,081 Auteur: Guiraut Riquier Genre: Vers Numero: CLXXXII

Tant m’es l’onratz verays ressos plazens

I	1	Tant m’es l’onratz verays ressos plazens,
		Ples de lauzor, del senhor N’Amalric,
		Del miei senhor filh premier N’Aimeric
		De Narbona, que mos cors n’es jauzens
	5	Qu’entrels Toscas s’es tan gent capdellatz
		Quels amicx a de la Gleysa honratz
		Els enemicx mortz e vencutz per guerra.
II		Mout es avutz belhs sos comensamens,
		De noble faitz, ab sen et ab cor ric,
	10	Que son sembla a l’aut dever antic,
		Que l’essenhan d’onor esser manens,
		De Narbona; don sia Dius lauzatz!
		Pero per Foys li ven, de l’autre latz,
		Devers ques deu tener a sojorn guerra.
III	15	L’onratz comus de Florensa valens
		Ac bon cosselh quan al Rey lo queric
		Per capitani, quar sey enemic
		Ne son al bas; don es siens l’onramens
		Per luy; don deu per tot esser lauzatz
	20	E car tengutz, ab tot que aja patz,
		Quar, si honran, l’a gent honrat de guerra.
IV		Si honran, a honratz sos benvolens
		E Narbona el bon Rey, que seguic,
		E Foys, e selh qu’en partidal noyric;
	25	Quar anc nol fes nesciejar jovens;
		Ans es ab sen curos et atempratz;
		Don es per totz sos enemicx dubtatz,
		Tant que lur es sos ressos pietz de guerra.
V		De Dieu li ven sos bos captenemens;
	30	Per qu’ieu li prec e li cosselh el dic
		Quel retenha quon senhor ad amic,
		Ab humil cor, de totz vils faitz temens;
		E creysser l’a en totas sas bontatz
		Si s’afortis contra vils voluntatz;
	35	Quar aissi vens hom espirital guerra.
VI		Lo senhor prec N’Amalric qu’enansatz
		Sia per luy sos pretz, gent comensatz,
		En totz sos faitz, aissi quon es per guerra.