Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Code: 167,053 Auteur: Gaucelm Faidit Genre: Canso Numero: 16

Si tot m’ai tarzat mon chan

I	1	Si tot m’ai tarzat mon chan
		ni n’ai faich trop long estatge,
		eras ai cor e talan
		q’en torn la perd’ e-l damnatge,
	5	qe-l bella-m dreiss’ al viatge
		e-m ditz q’ieu mostr’ en chantan
		lo joi e la valor gran
		qe-m donet, e l’alegratge
		lo jorn qe-m retenc baisan.
II	10	Adoncs l’estei tant denan,
		mas jointas, de bon coratge,
		de genoillos, en ploran,
		tro-m pres en son seignoratge ;
		mas al prim li fo salvatge,
	15	car m’ausiei enardir tan —
		Pois vi mon humil semblan,
		e receup mon homenatge,
		car mi conoc ses engan.
III		Amics, qan si vol partir
	20	de si donz, fai gran enfanssa,
		si tot no-il vol acuillir
		sos digz a la comenssanssa ;
		q’amors s’abriv’e s’enanssa
		ab honrar et ab servir ;
	25	e qui-s vol de lieis jauzir
		sia-il de bella semblanssa,
		e sapch’ amar e sofrir.
IV		Mi donz am tant e desir
		qe, qi-m meti’en eganssa,
	30	en tant cum hom pot chausir
		non penri’en acordanssa
		que ja mudes m’esperanssa,
		ni-s camjesson miei desir ;
		ni non vuoill esdevenir
	35	senes liei seigner de Franssa !
		Gardatz si voill q’ill m’azir !
V		Maintas sazos s’esdeve
		qu’en pens tant fort e cossire,
		qe non auch qui parl’ ab me,
	40	ni fatz mas tremblar e frire ;
		e pens que Dieus volc assire
		mas q’en una sola re
		las beutatz qu’ill a ab se,
		e-l gen parlar e-l doutz rire,
	45	ab qe m’alegr’ e-m rete.
VI		Tot ai per ma bona fe
		conquis so don sui jauzire,
		e prec mi donz per merce
		qe-l sieu cors del mieu non vire,
	50	qe sos hom e sos servire
		sui et ai estat ancse —
		Et ades poja e ve
		l’amors, e doblo-il desire
		on il plus mi fai de be.
VII	55	Linhaure, lai vir mon fre
		vas Santongier, cui desire
		e vuoill s’amor e son be.