Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Code: 167,008=388,004 Auteur: Gaucelm Faidit , Raimbaut Blacatz Genre: Partimen Numero: 18

Ara-m digatz, Gaucelm Faidit

		La tenzo de Gaucelm Faidit et d’En Rembaut
I	1	Ara-m digatz, Gaucelm Faidit,
		cals val a bona domna mais,
		qan ha marit q’es pros e gais,
		e vol de drut penre chauzit ;
	5	e dui cavalier pro e gen
		an en lieis lor entendimen,
		e l’us es enemics mortals
		del marit, l’autr’ amics corals ?
		Chascus fai per lei son poder —
	10	chauzetz qal deu miels retener.
II		En Raimbaut, d’aqest joc partit
		pren lo miels, e-l sordei vos lais !
		q’eu dic per dreit, e non biais,
		qe-l pro enemic del marit
	15	deu la domna, s’a pretz valen,
		retener, e l’autre-ill defen —
		que dizetz q’es amics corals
		del marit, et eu dic qu’es fals
		vas si e vas leis, per q’aver
	20	no-l deu la domna, ni voler.
III		Gaucelm, de trop avetz faillit,
		qar dizetz qe l’abras ni-l bais
		lui qe de guerra e de plais
		e de leis vol tener aunit
	25	o marit, per qe ço i enten ;
		donc mais deu amar, per un cen
		l’amic, qe es plus naturals,
		e per leis es al marit tals
		q’en metria-l cors e l’aver
	30	per far tot son autre plazer.
IV		En Raimbaut, domn’ab pretz complit
		no-s taing q’ab aital drut s’abais,
		qe l’autre fai mainz bos assais
		e, si es saubut ni auzit,
	35	ier l’onors, car de faillimen
		se gardon amdui cabalmen ;
		e l’autr’es fals’ amors venals
		ez amors escondud’ e mals ;
		e vos no-l devetz mantener,
	40	qe nuls bes no-n pot eschazer !
V		Gaucelm, mal seri’ establit,
		se l’amics q’anc jorn non s’estrais
		de far tot so q’a sidonz chais,
		e-n fai maint don e maint convit,
	55	anz no-i trobava chauzimen,
		qe l’altre, qe l’auci sa gen
		e-ls encaussa trosq’als portals,
		e non l’amet anc per ren als,
		mas per guerr’ e per deschazer ;
	50	per qe-i deu miels l’amics jazer —
VI		En Raimbaut, anc no m’abeillit
		que ves bona domna s’eslais,
		per jazer, aitals drutz savais,
		q’aissi a son amic traït ;
	55	e la domna lui eissamen
		traït, si tracia-l consen ;
		qe non pot eissir bos jornals,
		e no-il es de l’amar cabals,
		car mais val e mais den valer —
	60	et, qe qe-us digatz, eu dic ver.
VII		Gaucelm, non fai nuil faillimen
		l’amics, s’a si donz es leials,
		et es enjanz e tortz e mals
		si domna no-ill fai son plaser,
	65	pueis tot quant il vol sap voler.
VIII		En Raimbaut, de vostre conten,
		etz vencutz, vos e l’amics fals ;
		per que totz jutjaire leials
		dira, si-il dreit vol mantener,
	70	que vos failletz, et ieu dic ver.