Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Code: 167,020a Auteur: Gaucelm Faidit Genre: Canso Numero: 19

D’un amor, on s’es asis

I	1	D’un amor, on s’es asis
		mos ferms cors fis,
		movon tuit miei cortes saber —
		c’Amors m’ensegna
	5	cansons far, e m’en aisis
		e m’esbaudis,
		cor e sen e geng e poder,
		per c’ieu devegna
		e gais sos
	10	coindes e bos,
		qe, s’ill non fos,
		gia, per autr’ isciensa,
		mos trobars,
		q’ies fins e clars,
	15	non fora cars
		ni agra gran valensa.
II		Ni non cre qu’om gia-l grasis
		ni abelis
		gia, tant non o sabr’eu voler,
	20	s’Amors, ce regna
		e me, giors e sers e matis,
		no m’encrecis
		de vos, ce-m fatç viur’ e valer,
		domn’, on c’ieu tegna ;
	25	tant ets pros
		ce mas cansos
		an pretz per vos,
		e per so, non bistensa
		mercejars
	30	e mos cantars,
		ni gens prejars
		ab cor d’umil parvensa.
IV		Donc, non es ges vers devis
		aicell ce dis
	35	c’ieu cant per onor et aver,
		ch’en re no-l degna
		mos cors, tant per ce-n mentis
		lei c’obesis,
		e mos cantç on no fats parer
	40	ce-m desovegna
		sos gioios
		cors amoros ;
		es es rasos,
		qu’en tant, ses faglensa,
	45	com clau mars,
		non es sa pars,
		per qe-l lausars
		de leis, e-l pretz, m’agenssa.
IV		Soau e gient me concis,
	50	can volc c’ieu vis
		son bell cors blanc gioios giaser,
		don bes me vegna !
		e no cresatç ce ieu partis,
		s’il m’o sofris,
	55	can vi so qu’ieu plus volc veser !
		trop cut qe-m fegna,
		c’a sasos
		noç ben al pros
		pauc ociaisos ;
	60	e per so-m fai temensa
		fols vanars
		e trop parlars,
		ce mans afars
		assi-s desavinensa.
V	65	Pero tan be-l soi aclis,
		can so que-ll quis
		me det, qe pes no-m pot plaser
		c’autra-m retegna ;
		ans no lais Lemosis
	70	— us dotç païs ! —
		per lieis, en cui ai bon esper
		ce giois m’en vegna ;
		don janglos,
		contrarios,
	75	fals, ni gelos,
		no-i ag’ entendensa !
		ce-l ganglars,
		ni-l cridars
		braus : « fals amars ! ».
	80	nos ni nostr’ amor vensa !
VI		E per aiso m’esgausis,
		car s’afortis
		mos Bels Sobiras al cor ver
		— cui pretz revegna ! —
	85	qu’era, s’ell no l’acugllis,
		ja meg aucis
		per tals qui-ll degran mantener
		e tall qu’estregnha
		son cors blos
	90	— flac enoios,
		vas gioi dutos !
		Mas, a lui, a tenensa
		pretç, donars
		ses faitz avars,
	95	e gens ondrars
		ab francha captenensa.
VIII		Ma cansos
		ab ditç gioios,
		va dir cochos
	100	a N’Agout, en Provenssa,
		ce-l prets clars
		de vos m’es cars,
		e-l gerejars
		de Santongier m’agensa.