Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Code: 167,021 Auteur: Gaucelm Faidit Genre: Canso Numero: 20

D’un dotç bell plaser

I	1	D’un dotç bell plaser
		plasen,
		movon miei cant ver,
		valen,
	5	gien,
		car si mos solatç
		platç
		als fins ben credentç,
		ni s’ieu be
	10	fats re,
		de midons me ve,
		cui ne soi grasire —
		Liei desire,
		si c’allior
	15	mon desir no vire,
		car lieis am e lieis ador
		e causisc per la meglior.
II		Sol al sieu voler
		m’aten,
	20	car del sieu saber
		apren
		sen
		tal, don m’es donatç
		gratç
	25	pels plus conoisentç —
		Tant gent me
		mante
		la sua merce
		c’ar soi bos sofrire,
	30	ce gausire
		soi d’amor,
		don giausentç consire ;
		et anc a nul amador
		non avenc tant de ricor.
III	35	Et fats so parer
		soen,
		car, del clar dutç ser
		giausen,
		pren
	40	consiriers amatç —
		— Fatç
		soi, e pauc sofrentç,
		car en fre
		no-s te
	45	ma boca ; per ce
		tagn, las ! q’ieu-m n’asire
		cant m’albire
		sa valor,
		e fols trop pot dire !
	50	— Soi donc fols, s’ieu dic m’onor ?
		— Oc, se-l ditç torn’ a folor.
IV		Com gia-m det poder,
		enten
		q’ieu ages leser,
	55	disen
		len
		los bes ce m’a datç…
		— Patç !
		Sofren, clau las dentç !
	60	No-t sove
		ce se
		pert drutç, si no cre ?
		— Trop potç ver asire.
		— Voll m’aucire ?
	65	Si-m socor
		cill cui soi servire ?
		ni morai, si-n tais lausor,
		o si-l dir no l’an sabor !
V		Ben dei doncs temer
	70	temen ;
		pero, leis c’esper
		grasen,
		ren
		merces dels onratç
	75	latç
		de ce-m fes presentç —
		e ssap, se
		no-m ve,
		tant li ai lial fe,
	80	c’el cor la remire ;
		e-n sospire
		de dolor,
		e-n trauc greu martire,
		car del tornar ai paor
	85	que-m tegna per mentidor.
VI		Pot li doncs cale
		s’ieu men ?
		— Hoc, gia-t vol veser ;
		vai t’en !
	90	fen
		totç altres pensatç,
		natç
		de flacs pensamentç —
		— Tremer te
	95	cove ! —
		— Vau duncs ! gioi mi me
		si q’ eu deia rire —
		— E no-t tire,
		chanso ! cor,
	100	tost, ses escondire,
		a’N Sobira, mon segnor,
		cui Pretç pren per validor.
VI		N’Agout aus eslire
		e ’N Plus Avinent, c’ap lor
	105	acap bon pretss e valor.