Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Code: 167,044a Auteur: Gaucelm Faidit Genre: Canso Numero: 23

Oimais taing que fassa parer

I	1	Oimais taing que fassa parer,
		jauzens e desliures d’esmai,
		mon ric joi ab joios voler
		en un vers, pois a midonz plai,
	5	q’aoras sai
		que cel q’a bon seignor s’atrai
		es de ric don rics jauzire
		si sap esser bos sofrire,
		francs, adreitz, complitz de tout be,
	10	aitals cum ad Amor cove.
II		Ja fis amics no-is desesper
		de sidonz, si tot mal en trai,
		que so c’anc non cuidei vezer
		vei, per ma dompn’al cor tant jai !
	15	c’a penas sai
		qui fui ni qui sui, tant be-m vai !
		qe, qand e mon cor cossire,
		ieu non cuig ni no m’albire
		s’ieu fos cel que suoil, c’ar en me
	20	es lo jois qe d’amor mi ve.
III		Car amars ab sobretemer
		e gens servirs ab cor verai
		m’an aduig e m’an faich aver
		un ric joi jauzion, q’ieu ai
	25	de lieis don sai
		q’el mon tant bella non estai ;
		car qui fazia assire
		la genser d’autras qe-is mire
		pres de lieis, non parria re
	30	qu’il anc beutat agues ab se !
IV		D’aisso trac guiren q’ieu dic ver
		son bel ris e son gen cors gai,
		l’adreich parlar e-l ric saber
		e-l dolç esgart q’ab sos huoills fai ;
	35	de ver o sai —
		Plus non aus dir ni non dirai,
		de sol aitan cre q’eslire
		puosc’ om, de cui o voill dire,
		c’a saber es leu qui la ve
	40	qe jois tant bella non mante.
V		Ara m’effortz, c’ar ai poder,
		pois tant rics jauzimens m’eschai,
		de mon joi celar ni tener,
		car ades a totz no-l retrai ;
	45	mas, car ieu sai
		q’amors per decelar dechai,
		e q’aissi-s pot hom aucire,
		e q’aissi-s pot hom aucire,
		si saimon cor escondire,
	50	qe ja lausengier d’engan ple
		no sabran don plus mi sove.
VI		Dompna, mei joi, e mei plazer,
		mos desirs don ja non partrai
		tant cum vida-m vuoilla valer,
		etz vos, cui am et amarai !
	55	q’en vos, o sai,
		totztemps e ja ren no-us qerrai
		don vostre rics cors s’azire —
		mas prec vos, q’als non dezire,
		que ajatz avinen merce
	60	de mi, qe-us am per bona fe.
VII		Nuills hom d’amar no-is deu temer,
		que, plus q’en mil jorns non forfai,
		esmend’ Amors en un sol ser :
		per q’ieu ja no-m desperarai
	65	pos aisso sai —
		anz prec mon vers q’a midonz, lai,
		sia de mon cor grazire ;
		et d’aqui — q’aillors no-is vire —
		vas mon Plus Avinen desse
	70	on bos pretz enanss’ e reve !
VIII		Vas mon Sobeiran me vire
		de bon cor, qui que-s n’aïre,
		e s’ieu per luy amar pert be,
		no-m cal, pus tan gen me rete !