Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Code: 167,029 Auteur: Gaucelm Faidit Genre: Canso Numero: 26

Ges no-m tuoill ni-m recre

I	1	Ges no-m tuoill ni-m recre
		de solatz ni de chan,
		ni-m desconort en re
		per perda ni per dan,
	5	ni qand avers mi ve
		no m’en don joi trop gran,
		q’enaissi s’endeve —
		Pero d’ir’ e d’esmais
		sui issitz, q’us rics jais
	10	de midonz cui ador
		mi ven al cor e-m n’ais :
		entiers, plens de doussor,
		fis, valens, e verais.
II		Ai ! tan gen mi rete
	15	la bella cui reblan,
		qan del cor mi sove
		qu’il m’emblet, sospiran,
		qan alenet vas me
		e ma bocha baisan…
	20	e-l cors seguet l’ale,
		c’ab aital geing lo-m trais,
		e car aquel doutz bais
		m’ac tant doussa sabor…
		La bella qe m’apais
	25	fetz m’apres tant d’onor,
		c’anc puois jois no-m sofrais.
III		Aqest jois mi reve
		e m’a gitat d’afan,
		e-m renovel’ e-m te,
	30	don m’esbaudei cantan…
		La bella sap e ve
		que mi ni mon talan
		non loing de sa merce,
		ni-m camje ni-m biais ;
	35	anz, car Amors m’atrais
		ab tant honrat seignor,
		li fatz fin del pantais
		don m’a fach sofridor
		mains jorns en mains assais.
IV	40	Per lieis am joi e me,
		q’ie-l soplei mercejan,
		car finamen e be
		vai sos pretz ad enan,
		e l’onor qu’il mante,
	45	e-l gai cortes semblan
		son de joi, e cove
		c’Amors e jois l’apais…
		Et es tant sos cors gais
		qe-il auzeill chantador
	50	s’en alegron pels plais,
		e n’an gaug entre lor,
		e-n fan voutas e lais.
V		E pois aissi s’ave
		qe-il plai qe monte tan,
	55	conquest m’a per jasse
		per far tot son coman ;
		car, de cor e de fe,
		l’am si, qe tan ni qan,
		non vir aillors mon fre
	60	ni-m desrenc ni m’eslais ;
		e si per estz fals brais
		qe fan lausenjador
		no-is camja ni s’irais,
		pro m’estai mieils d’amor
	65	q’a Floris el palais !
VI		Us avinens rics jais
		fis, valens e verais,
		a N’Agout mon seignor
		sobr’ atretant e mais
	70	cum a mais de valor
		d’un veir’ us rics balais !