Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Code: 167,031 Auteur: Gaucelm Faidit Genre: Canso Numero: 27

Jauzens en gran benananssa

I	1	Jauzens en gran benananssa,
		ab fin cor partit d’error,
		franc, fizel, d’umil semblanssa,
		rend mil merces ab doussor
	5	ad Amor
		d’un ric joi — don bes mi veingna ! —
		qe-m detz, ab gen
		socor valen,
		vos, dompna, en cui pretz reigna,
	10	lai on-m trazetz d’espaven.
II		Ladoncs, ab douss’ entresseigna,
		me fetz dous comenssamen
		de fin’ amor, que m’enseigna
		ad amar celadamen
	15	d’avinen
		vos, en cui bos pretz s’enanssa
		e-us creis valor,
		car, per meillor,
		vos chausi senes doptanssa,
	20	qan mi-us diei a servidor.
III		E qan d’aisso-m pren membranssa,
		ai gaug, et apres, paor,
		qe vos, on ai m’esperanssa,
		esgardetz vostra ricor,
	25	e c’aillor
		ametz, si que-us dessoveigna
		de mi, qe-m ten,
		de tot mon sen,
		a far tot so qe-us coveigna,
	30	qe d’als non ai pessamen.
IV		Dompna, tot qant mos cors deigna,
		miei dezir e miei talen,
		etz vos, cui prec dan no-m teigna,
		pel joi qe-m fezetz parven
	35	franchamen
		lausengier ni devinansa,
		q’ieu port lauzor
		de vostr’ honor,
		e vos fauc de mi lianssa
	40	a lei de fin amador.
V		Tant vos am, qe vostr’ amanssa,
		qand no vei vos cui ador,
		mi destreing si e-m balansa,
		qe-l cors m’art, e dels huoills plor
	45	de dolor,
		eissamens cum la vertz leigna
		q’el fuoc arden
		ploran s’empren,
		e tem qe-l dols me desteigna,
	50	si no-us puosc vezer breumen !
VI		Ab sol qu’ieu de re no-m feigna
		don perda mon jauzimen,
		dreitz es ma dompna-m reteigna,
		qu’ela m’a fait de nien ;
	55	si-l sieu pren,
		no fai tort, ni malestanssa —
		don ad auctor
		trac lo seignor
		de Peitieus, cui honrainssa
	60	e pretz capdell’ e socor.
VII		Mos Bels Sobeiras s’enanssa,
		ab gran valor,
		e vol amor
		aver, al for de Franssa,
	65	que lonc prec li fan paor !