Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Code: 167,001 Auteur: Gaucelm Faidit Genre: Canso Numero: 28

Ab chantar me dei esbaudir

I	1	Ab chantar me dei esbaudir
		de l’ira e del pessamen,
		qu’estat ai en tal marrimen
		qu’a pauc no m’an mort li sospir ;
	5	et agra-m mestier qu’ab merce
		poques conquistar qualque re
		de que melhures ma razos
		e mos cors n’estes plus joyos.
II		Mas ges no-s pot de me partir
	10	us dezirs que-m lassa e-m pren,
		que totz mos coratges m’enpen
		vas selieys que-m pogra guerir ;
		e, s’ilh non a de me merce,
		pot saber que murai de se,
	15	que tant es mos mals perilhos
		que autres metges no m’es bos.
III		Amiga, no-m vulhatz aucir,
		que, si eu anc fis falhimen,
		ves vos ieu m’en captenrai gen,
	20	tot aissi cum auziretz dir ;
		qu’ades sui en vostra merce
		e vostres ai estat ancse ;
		vostr’ om sui en totas sazos
		et ades me reclam per vos.
IV	25	Dona, la nueg e-l jorn cossir
		de vostre gent cors avinen,
		qu’en ren als non ai mon talen,
		ni re mai sotz cel non dezir ;
		qu’aissi-m tenetz pres en merce,
	30	que ges del cor non ai ab me :
		Pus me e-l cor avetz, amdos
		gardatz, que-m sia quals que pros.
V		Qu’ieu sui faitz al vostre servir
		et al vostre comandamen,
	35	que vos m’avetz fag de nien
		et ieu deg vos o mout grazir —
		Dona, per Dieu e per merce,
		vos prec que-m fassatz qual que be,
		que tant sui de vos cobeitos
	40	que muer si no m’es faitz lo dos !
VI		Senher N’Agot, totas sazos
		estai vostre pretz fis e bos.