Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Code: 167,055 Auteur: Gaucelm Faidit Genre: Canso Numero: 34

Solatz e chantar

I	1	Solatz e chantar,
		joy e deport e rire,
		cugei tot laissar
		e viur’ a gran martire ;
	5	mas silh cuy tenh car
		e cobey e dezire
		e dupt e reblan
		vol que torn en mon chan ;
		qu’era mortz a son dan,
	10	ditz, e fai cortezia —
		quar no vol sufrir
		ma doussa car’ amia
		que-m laysse morir !
II		Quar, si Dieus me gar
	15	lieys de cuy suy servire
		— e no puesc jurar
		plus fort per vertat dire —
		non pogron durar
		may un jorn il sospire
	20	qu’ieu de plan talan
		no moris deziran ;
		per so-lh grazisc chantan
		a la belh, on qu’ieu sia,
		l’onrar e-l servir,
	25	e-l joy que-m ven quec dia
		de lieys cui dezir.
III		Be-m dey alegrar,
		gar silh que-m vol aucire
		mi vol esmendar
	30	lo mal don suy sufrire,
		qu’ab un dous bayzar
		mi venc al cor assire
		un ric joy prezan ;
		e si-n suy en afan,
	35	mos Bos Espers m’a tan
		donat q’ieu no-l poiria
		la meytat grazir
		si per tostemps vivia,
		quan be m’o cossir !
IV	40	S’hom per ben amar
		fo anc d’’amor jauzire,
		be-m deu joyos far
		la bella don no-m vire ;
		que vendre o dar
	45	me pot — et no s’albire
		qu’autra mi deman ;
		qu’ades, vas on qu’ieu m’an,
		suy sieus, ses tot enjan ;
		e, si tant s’umelia,
	50	que-m vuelh enriquir
		d’aquo qu’ieu plus volria,
		be-m dey esbaudir !
V		Qu’aissi-m fay tremblar
		ma domn’ el cor, e frire,
	55	qu’ab sol son parlar
		volf e vir en cossire,
		quan son bel vis clar
		e son gen cors remire,
		dreit e benestan ;
	60	et ai joya tan gran
		can mi fai bel semblan
		d’amor, que par que-m ria,
		q’ieu re no-lh sai dir
		d’aisso qu’ops me seria :
	65	si-m fai joys falhir !
VI		De ben e d’onrar
		suy a mi dons grazire,
		e dey m’en lauzar,
		mas d’autra part m’azire :
	70	que, si tot no-m par,
		mon senhor suy mentire,
		qu’ieu prec e reblan
		de cor e de talan :
		qu’estat n’ai mais d’un an,
	75	et ai fait gran folia —
		qu’ab luy aug venir
		joy e pretz, tota via,
		cuy qu’enuey ni tir !
VII		A Ma Capa man
	80	en ma chanso chantan
		ma benanansa gran !
		e lay, en Lombardia,
		guar Dieus de falhir
		Ric de Joy e s’amia,
	85	tant quant ieu dezir…