Wolf, George; Rosenstein, Roy. The Poetry of Cercamon and Jaufre Rudel. New York & London: Garland Publishing, Inc, 1983

[CdT en procés d'incorporació]

Code: 112,002a Auteur: Cercamon Genre: Vers Numero: 1

Lo plaing comenz iradamen

I	1	Lo plaing comenz iradamen
		d’un vers don hai lo cor dolen;
		ir’e dolor e marrimen
		ai car vei abaissar Joven:
	5	Malvestatz puej’e Jois dissen
		despois muric lo Peitavis.
II		Remazut son li prez e·il lau
		qi solon issir de Peitau;
		ai! com lo plain[o] li Barrau;
	10	[p]e[za·m] s’a longa[s] sai estau;
		Segners, lo baro q’ieu mentau
		metet[z], si·us platz, em Paradis.
III		Del comte de Pitieu mi plaing
		q’era de Proeza compaing;
	15	despos Pretz et Donars soffraing,
		peza·m s’a lonjas sai remaing;
		Segners, d’efern lo faitz estraing,
		qe molt per fon genta·sa fis.
IV		Glorios Dieus, a vos me clam,
	20	car mi toletz aqels q’ieu am;
		aissi com vos formetz Adam,
		lo defendetz del fel liam
		del foc d’efern, qe non l’aflam,
		q’aqest segles nos escharnis.
V	25	Aqest segle teing per enic
		qe·l paubre non aten ni[·l] ric;
		ai! con s’en van tuit mei amic,
		e sai remanem tuit mendic;
		pero sai ben q’al ver afic
	30	seran li mal dels bos devis.
VI		Gasco cortes, nominatiu,
		perdut aves lo segnoriu;
		fer vos deu esser et esqiu,
		don Jovenz se clama chaitiu,
	35	qar un non troba on s’aiziu,
		mas qan N’Anfos, q’a Joi conqis.
VII		Plagnen lo Norman e Frances,
		e deu lo be plagner lo reis
		cui [el] laisset la terra e·l creis;
	40	pos [ai]tan grant honor li creis,
		mal estara si non pareis
		chivaugan sobre Serrazis.
VIII		Aqil n’an joia, cui qe pes,
		de Limozi e d’Engolmes;
	45	si el visques ni Deu plagues,
		el los agra dese conqes;
		estort en son car Dieus lo pres,
		e·l do[l]s n’es intratz en Aunis.
IX		Lo plaingz es de bona razo,
	50	qe Cercamonz tramet N’Eblo;
		ai! com lo plaigno li Gasco,
		cil d’E[s]paign’ e [cil] d’Arago;
		Sant Jacme, membre·us del baro
		qe denant vos jai pelegris.