Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Code: 167,015 Auteur: Gaucelm Faidit Genre: Canso Numero: 53

Chant e deport, joi, dompnei e solatz

I	1	Chant e deport, joi, dompnei e solatz,
		enseignamen, larguez’ e cortesia,
		honor, e pretz, e leial drudaria,
		an si baissat engans e malvestatz
	5	c’a pauc, d’ira, no-m sui desesperatz —
		car, entre cen dompnas e prejadors,
		non vei una ni un qe be-is captegna
		en ben amar, ni en ver qe no-is feigna
		ni sapcha dir q’es devengud’ Amors !
	10	Gardatz cum es abaissada Valors…
II		Car drutz hi a, e dompnas, si-n parlatz,
		qe-is feigneran e diran, tota via,
		qu’ill son leial et amon ses bauzia ;
		e pois, chascus es cobertz e celatz,
	15	e tricharah, sai e lai, vas totz latz ;
		e las dompnas, ont plus an amadors
		e mais cuidon c’om a pretz lor o teigna —
		Mas aitals bes co-is cove lor en veigna !
		c’a chascuna es ant’ e deshonors
	20	pois a un drutz, que puois desrei’ aillors.
III		Aissi cum mieills es en dompna beutatz,
		gens acuillirs et avinens cundia,
		e bels parlars, pretz e doussa paria,
		aissi deu mieills gardar sas voluntatz ;
	25	que ren no val cors de doas meitatz
		ni non es fis, puois i vaira colors,
		car una sol’ amors taing la destreigna.
		— non dic ieu jes q’a dompna descoveigna
		s’om la preja, ni a entendedors,
	30	mas jes non deu en dos luocs far socors ! —
IV		Tant cum reignet leialmen amistatz,
		fo-l segles bos e senes vilania,
		mas, puois c’Amors tornet en tricharia,
		es deschazutz Jovens, et abaissatz —
	35	Et ieu meteis, pos dir vuoill las vertatz,
		ai tant apres dels fals drutz trichadors,
		qe non es dreitz que la mais en reveigna ;
		que lieis on Jois e Pretz e Beutatz reigna,
		si cum m’agues faich mal, fugi de cors,
	40	quan m’ac garit et enanssat e sors !
V		E s’il plagues qe-l sieus bels cors honratz
		qe-m retenc gen en leial seignoria
		s’afranques tant, pois en al s’omilia,
		qe-m perdones, aissi for’ afinatz
	45	vas lieis, cum l’aurs s’afina en la fornatz,
		e no-m nogues Paratges ni ricors ;
		quar, s’era-m tol de mal ni far o deigna,
		aissi-l serai fis, ses fals’ entresseigna,
		cum fo-l leos a-N Golfier de Lastors
	50	qan l’ac estort de sos guerriers pejors.
VI		E s’aquest tortz, dompna, -m fos perdonatz,
		passat agra la mar part Lombardia ;
		mas non cuich far leialmen romavia
		si no m’era vas vos adreichuratz ;
	55	sol per aisso degratz voler la patz ;
		e, car Merces es en vos, et Honors,
		an ma chansos, que res no la reteigna,
		a vos prejar franchamen que-us soveigna
		q’a gentil cor taing franques’ e doussors,
	60	e Dieus perdon’ als bos perdonadors.
VII		Na Maria, tant es la grans valors
		q’en vos estai, bona dompna, e reigna,
		q’ie-m meravill que nuills cors la sosteigna —
		e chascun jorn creissetz als trobadors
	65	avinens faitz, don crescan las lauzors.