Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Code: 167,023=366,017 Auteur: Gaucelm Faidit , Peirol Genre: Tenso (partimen) Numero: 60

Gaucelm, diguatz m’al vostre sen

I	1	— Gaucelm, diguatz m’al vostre sen
		qals drutz ha mais de son plazer ?
		cel c’ab sa bona dona jai
		tot’ una nueit, e non lo fai ;
	5	ho cel qui ve a parlamen,
		e no a lezer gaire
		mas quant d’una vetz faire,
		e aqui meteis torna s’en ?
II		— Peirol, al meu conoisemen,
	10	sel c’una nueit hi pot jazer
		deu ben aver dos tans de jai
		que sel qu’o fai e pueis s’en vai ;
		qu’el jazer ha plazers tals cen,
		s’es qui be-ils sapcha traire,
	15	q’inz es meiller amaire
		que-l fait c’om en tal cocha pren.
III		— Gaucelm, ben ha gran espaven
		aquel qu’es en autrui poder,
		que trastot’ una nueit i jai
	20	de lonc cella que plus li plai,
		e non pot aver son talen
		ni sa voluntat faire,
		don trai negus pecaire,
		ins en enfern, aital turmen.
IV	25	— Peirol, molt vos razonatz gen,
		estiers d’amor no faitz parer
		qu’en sapchatz tan con ieu en sai !
		dizetz c’om ab sidons maltrai
		abrassan et baizan sove ;
	30	segon lo mieu vejaire,
		non es cortes amaire
		cui tals maltraitz fai espaven.
V		— Gaucelm, aissi non a conten,
		c’a dreg lo poscatz mantener :
	35	si-l faires non es, quant s’eschai,
		totz los autres plazers desfai ;
		e, qui recep son joi breumen
		en abans que repaire,
		aquel jois don es laire
	40	li dura pueisas longamen.