Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Code: 242,026 Auteur: Giraut de Bornelh Genre: Chanson religieuse Numero: XXI

Be veg e conosc e saj

I		Be veg e conosc e saj,
		per so quar proat o aj,
		que, qui plus el secgl’estaj,
		pus y a dol et esmay;
	5	e selh que per pieitz mal tray
		es fols e plus, quar no·s tray
		lai on sap que tostemps may
		viura ses dol e ses pena.
II		Senhers Dieus, drechuriers, cars,
	10	humils, resplandens e clars,
		entre mos nescis pessars
		son endevengutz lïars;
		mais ar conosc que l’amars
		d’aquest secgle es amars:
	15	qu’om n’es fols e tant avars
		per que n’a pueis dol e pena.
III		Que·y non es hom aut ni bas
		que per la greu mort non pas;
		e donx, pessa de tu, las!
	20	Que ia saps be que morras,
		et ades ves la mort vas;
		e s’ans qu’om te met’el vas
		no·n pensas, ia non seras
		nuls temps ses dol ni ses pena.
IV	25	Vols que·t done bon conort?
		Fai de ton cor feble fort,
		et aissi de ton gran tort
		trobaras ab Dieu acort;
		si non o fas, tem que·t port
	30	tos fols volers a tal port
		que viuras apres la mort
		totztemps ab dol et ab pena.
V		Qu’om no viu dos iorns essems
		ses trebalh, e pueis falh temps,
	35	qu’om mor doloiros ab gems,
		e put pus mil tans que fems;
		e si vols venir per temps
		a Dieu ni l’amas ni· l temps,
		ia non seras de ioy sems,
	40	ni trairas mays dol ni pena.