Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Code: 165,003=350,001 Auteur: Peire de Mont Albert , Gaucelm Faidit Genre: Partimen Numero: 66

Gaucelm, qe-us par d’un cavalier

I	1	Gaucelm, qe-us par d’un cavalier
		franc e pro e larc e meten,
		qi s’es partitz per marrimen
		e per enuei de sa molier,
	5	si tot era franch’ e cortez’ e gaia ;
		e-l drutz, qu sap q’il es vas lui veraia,
		l’a ’spozada ses noiz’ e ses defes —
		A qal dels dos vos par sia meils pres :
		celui qi s’es de son enoi liuratz,
	10	o l’autre, q’ar a zo qe plus li platz ?
II		Peire de Montalbert, no-i qier
		conseil en aital partimen,
		q’estai qe tant a-l cor jauzen
		cel qi zo qe plus vol conqier,
	15	q’el mond non ha res qe tan fort li plaia ;
		non dic ieu ges qe l’autres jois non aia,
		qe s’es liuratz de l’enoi don fos pres ;
		mas ges lo jois tan gent complitz non es
		con es d’aicel qi tot jorn pren en gratz
	20	zo qe plus vol, e s’i ten per pagatz.
III		Gaucelm, si tot ha gaug entier
		lo drutz, lo mariz n’a tal cen ;
		qe pen’ e dolor e turment
		pert gant laissa son encombrier ;
	25	e neguns hom no-l sap si ne l’assaia,
		ni pot saber con lo maritz s’esmaia
		qi ten forsatz zo qe non ama res ;
		e gant ab sen a tan fag e conqes
		qe pot guerpir zo don plus er’ iratz,
	30	nul major joi no-il pot esser donatz !
		. . . . . . . . . . . . . . . . . . . . . . . . . . . . . . . . . . . . . .
IV		Gaucelm, ben tenria leugier
		lo maritz cui ha pres tan gen,
		si la mais a tot son viven
		oblides son joi tan sobrier ;
	35	oimais no-l cal qe-s trebail ni maltraia,
		pos estortz es d’aital meizo savaia,
		don deuria far fest’ a chascun mes ;
		e-l drutz qi s’es cargatz d’aqilh metes,
		si tot s’en er’ al prim enamoratz,
	40	molt tost li pot sos cors esser camjatz.
		. . . . . . . . . . . . . . . . . . . . . . . . . . . . . . . . . . . . . . . .