Wolf, George; Rosenstein, Roy. The Poetry of Cercamon and Jaufre Rudel. New York & London: Garland Publishing, Inc, 1983

[CdT en procés d'incorporació]

Code: 112,001b Auteur: Cercamon Genre: Canso Numero: 4

Ab lo temps qe·s fai refreschar

I	1	Ab lo temps qe·s fai refreschar
		lo segle e· [ls pratz] reverdezir,
		vueil un novel chant comenzar
		d’un’amor cui am e dezir;
	5	mas tant s’es de mi loignada
		q’ieu non la puesc acoseguir,
		ni de mos digz no s’agrada.
II		Ja mai res no·m pot conortar;
		abanz mi laissaratz morir,
	10	can m’an fag de mi donz sebrar
		lauzenjador, cui Deus azir!
		Las! tan l’aurai dezirada
		qe per lei plaing, plor, e sospir,
		e vau cum res enaurada.
III	15	Aqesta don m’auzet[z] chantar
		es plus bella q’ieu no sai dir;
		fresc’a color e bel esgar,
		et es blancha ses brunezir;
		oc, e non es vernisada,
	20	ni om de leis non pot mal dir,
		tant es fina [et] esmerada.
IV		E sobre tota·s deu prezar
		de dic ver, segon mon albir,
		d’ensegnamen e de parlar,
	25	c’anc non volc son amic traïr;
		et ieu fols [fui] la vegada
		car crezei ren q’en auzis dir,
		ni·l fis so don fos irada.
V		Anc ieu de lei non volc clamar,
	30	q’enqer, si·s vol, me pot jauzir,
		et a ben poder de donar
		d’aqo on me pot enrequir;
		no posc far lonja durada,
		qe·l manjar en pert e·l durmir,
	35	car no m’es plus aizinada.
VI		Amors es douza al mirar
		et amara al departir;
		q’en un jorn vos fara plorar,
		et autre jogar e burdir;
	40	q’eu sai d’amor enseigniada:
		on plus la cujava servir,
		ilh es vas mi cambiada.
VII		Messatges, vai, si Deus ti guar,
		e sapchas ab mi donz furmir,
	45	q’eu non puesc lonjamen estar
		[de] sai vius ni de lai guerir,
		si josta mi despoliada
		non la puesc baizar e tenir
		dinz cambra encortinada.