Kolsen, Adolf. Beiträge zur Altprovenzalischen Lyrik (42 Erstmalig Bearbeitete Dichtungen). Firenze: Leo S.Olschki, 1939

Code: 434a,061 Auteur: Serveri de Girona Genre: Canso Numero: 3

Si per amar leyalmen ab amor

I	1	Si per amar     Leyalmen ab amor
		Fin'e coral volgues valer Amors
		Als fis amanz, mi agra fait secors
		Aman, Penan     E languen Ses amor !
	5	C'anc far no·m volc, m'a fait lonc temps amar,
		E si pogues, pus re no·m val amars,
		Despreyera e laissera·m d'amar.
II		Pus gen preyar     Ne leyal preyador
		No vol Amors, que fa·ls no-preyadors
	10	Ses precse faitz de tantz rics locs seynors ?
		Gaban,     Trichan      Que·l sufren      Preyador
		N'an menor joy e·n prezon menz preyar,
		E pus no val ab Amor re preyars,
		Nom d'Amor pert, si·s dona ses preyar.
III	15	Pero donar     Devon bon donador
		Ses precs ; qu'esters no vey dreitz donadors.
		Mas ges Amors no deu segr'aytal cors ?
		Preyan     Donan      A valen      Donador
		Ab humils precs deu meylls Amors donar
	20	C'a cel cuy platz penre e no donars ;
		Car anc no fo nuylls hom pros ses donar !
IV		Qui gen honrar     No sab se e s'onor,
		Entrels honrans fal en destreis s'onors ;
		Mas cil cuy am, la gard'entrels myllors
	25	Honran,     Puian     E fazen     Faitz d'onor
		C'als pus honratz la fay s'onors onrar.
		C'onor e pretz e gratz adutz honrars,
		C'om ja non es honratz ses altr'onrar.
V		Gen vey gençar    Beutat en la gençor
	30	C'ades gença part totas las gençors
		Sa grans beutatz e sa fina colors,
		Luynan    D'enjan     Son plasen     Cors gençor
		Qu'entrels gentils sab tan asaut gençar
		Que passa totz gençamens, s'es gençars ;
	35	Mas eu no·l puis que·m don jaya gençar.
VI		La domn'als Cartz e Sobrepretz sab far
		Totz faitz valens, per que lor rics affars
		Las fay valer, e l'enfans sab be far !