Kolsen, Adolf. Beiträge zur Altprovenzalischen Lyrik (42 Erstmalig Bearbeitete Dichtungen). Firenze: Leo S.Olschki, 1939

Code: 434a,001 Auteur: Serveri de Girona Genre: Canso Numero: 13

A greu sera nuylls hom fals ne trazire

I	1	A greu sera nuylls hom fals ne trazire
		D'una cauza, que non o fos de cen,
		E si·m passatz una vetz sagramen,
		Ja no·us creyray de re qu'e·us auya dire,
	5	Si doncs força no·us tol vostre dever,
		Can hom non a contra força poder.
II		Bona domna, gencer qu'el mon se mire,
		Per vos o dic a las altras tan gen :
		S'eser pogues c'una·n fes falimen,
	10	— Pus n'agues fait un, e prec que no·us tire, —
		Si·s fera cen ; que no·s pogr'abstener,
		O lausenger o feron semblar ver.
III		D'un amic ay, qui·m fos leyals, dezire
		E qu'eu ames mon amic leyalmen ;
	15	Mas hom no fa entrels croys fait plasen
		Que vas enjan si con il fan no·s vire.
		Car si voletz re be far ne valer
		Entrels malvatz, faretz vos viltener.
IV		Gentils domna, viure·m faitz ab martire
	20	C'asseguiray mon mortal malvolen,
		E dic atal qui no·m tayn ne paren
		E ri de ço don dins el cor sospire
		E faitz m'acel, qui·m vol mal, be voler
		E lay servir, on nuyll be non esper.
V	25	Ja no·m sia nuyls homs fis ne servire
		Ne·m vuylla be, si non o fa parven.
		Pus non o faz, be·m servetz per nien !
		Aytan me val, si·m vol ma don'aucire
		Com si·m vol be, pus non o pusc saber ;
	30	Que·l mals no·m notz ne·l bes no·m pot plazer.
VI		La domn'als Cartz volgr'eu ab gaug vezer
		E Sobrepretz remirar e tener.
VII		Si·l reys Peyre fay a Deu son plazer,
		Be n'a razo, pus Deus li vol valer.