Kolsen, Adolf. Beiträge zur Altprovenzalischen Lyrik (42 Erstmalig Bearbeitete Dichtungen). Firenze: Leo S.Olschki, 1939

Code: 434a,078 Auteur: Serveri de Girona Genre: Sirventes Numero: 15

Un vers ay commençat

I	1	Un vers ay commençat,
		Ver semblan de pegueza ;
		Car dic que paubretatz
		Val trop mays que riqueza
	5	E domna ses beutatz
		C'azauta ne corteza
		Ez erguylls e braveza
		Que franc' umilitatz
		E nosenz e foudatz
	10	Que pura savïeza
		E c'onors ne largueza
		Tolres e cobeytatz.
II		Dreit a dreit razonat
		Ten hom a gran boneza,
	15	Mas tortz, en dreit tornatz,
		Es pus sobtils certeza ;
		Car per simples letratz
		Es razos leu defeza,
		Mas de razo mal meza
	20	Gençar es mays bontatz,
		E doctors es lauzatz,
		S'a razo d'altr'apreza ;
		Mas can de si l'a preza,
		Es pus pels prims presatz !
III	25	Greu viu hom ab rictat
		Ses tort e ses maleza ;
		Doncs per Deu s'es amatz.
		Mas qui viu ab paubreza,
		Bel' a domna, cresatz
	30	Qu'encen guerr'e conteza
		Ez es per tanz enteza
		Que·l marits n'es iratz,
		E l'humils es menatz,
		Mal batutz per simpleza,
	35	C'a de venjar flaqueza,
		E l'ergoyllos dubtatz.
IV		Los savis mal lor grat
		Força senz e franqueza
		D'aucir los fols e·ls fatz,
	40	E res tan fort no·ls peza.
		No manjo re en patz
		Ne jazon c'am besteza,
		Ans an vil vid'enpreza
		Per gen viur'engraixatz ;
	45	No dic dels avocatz,
		Qui porton la ma teza
		E volon tort'encesa
		A dir dreitz biaixatz.
		Gran faix a emparat,
	50	Qui honor a perpreza
		E pert se pus viatz
		Que domna leu enqueza.
		No podon viur'onratz
		Ses par d'autruy despeza !
	55	Anc deleitz ne nobleza
		No n'ac reys ne prelatz.
		Si·ls tolenz esgardatz
		Com son en gran auteza
		E an lauzor conqueza,
	60	Trop may val toltz que datz
VI		La domna dels Cartz jatz
		Entr'onor e franqueza
		E Sobrepretz s'es meza
		Justa leys, per que·m platz.
VII	65	Si vols esser lauzatz,
		Vers, vay t'en ves Monteza
		Al bon rey qui l'a preza,
		Don er totz temps presatz.