Stronski, Stanislaw. Le troubadour Folquet de Marseille. Genève: Slatkine Reprints, 1968

[CdT en procés d'incorporació]

Code: 155,024 Auteur: Folquet de Marseilla Genre: Tenso Numero: XV

Tostemps, si vos sabetz d’amor

I	1	Tostemps, si vos sabetz d’amor,
		triatz de doas cal val mays :
		s’es drutz de tal que no·s biays
		vas vos ni sofr’ autr’ amador
	5	empero no·us fay veiayre
		que·us am ni que s’azaut de vos,
		o d’autra que·us am atrestan,
		et a d’autres drutz un o dos,
		e que·us fassa de plazers tan
	10	com fin’amia deu faire.
II		Folquetz, mes m’avetz en error,
		que trop m’avetz partit greus plays,
		qu’en caseun a trebalh e fays ;
		pero si·n penray la melhor :
	15	be us dic qu’ieu no pretz gaire
		dona pos hi ay companhos,
		sitot mi fai d’amor semblan ;
		mays vuelh que m’o tenh’ a rescos
		leys que non aya cor truan
	20	c’ab bels plazers me cug trayre.
III		Tostemps, pauc avetz de valor
		si per aital amor es gays
		que, pus dona·us fay col e cays,
		par qe so tengu’ a deshonor :
	25	be·us dic, s’era·l reys sos paire,
		no·us es sos plaitz onratz ni bos ;
		mays val sela que·us tem e·us blan
		e·us mostra semblan amoros,
		sitot se vay pueys pereassan,
	30	cant vos non es e·l repayre.
IV		Folquetz, vos razonatz folor,
		quez anc dona pus son drut trays
		sos pretz no fon fis ni verays,
		ni·l sieu semblan gualiador
	35	no·l podon per ren refayre
		l’anta qu’ilh fay totas sazos ;
		mas de bona dona prezan
		say qu’en es pus ondratz sos dos :
		sitot no·m fay d’amar semblan
	40	no·m cal, sol m’am ses cor vaire.
V		Tostemps, li nosst donador
		fan tornar los bos dos savays,
		e par a lor semblan malvays
		que·l dar non lor aia sabor ;
	45	doncx, com pot dona ben fayre
		que·m mostre semblan ergulhos ?
		mielhs es c’om suefra·l bel enjan,
		c’aisso ja es bes trassios
		qu’ aven a motz e sofrir l’an :
	50	yeu cug que vos n’es cofraire.
VI		Folquetz, tals m’ac a servidor
		qes anc companhon no m’atrais,
		ara·m par qu’ad autre s’eslays,
		per qu’ieu m’en part e·m vir alhor ;
	55	mas vos qi es fis amayre
		cug que, si ab estas razos
		cujatz aisi cobrir lo dan
		e s’aisi perdes las chansos
		quez autre vos parta l’afan,
	60	no say per que·us es chantayre.
VII		Tostemps, de tort say dreg fayr e,
		per c’a mi platz esta razos ;
		e s’ie·us en vens, joi n’ayatz gran,
		car vos sofretz los companhos,
	65	mas eu n’am tal que-m fay semblan
		d’amor, e no·y ay cofraire.
VIII		Folquetz, tostemps fos gabayre !
		jutjada si’esta razos :
		a Na Gaucelma vuelh que·s n’an,
	70	e si ieu am ab companhos,
		ja per so no·y ira duptan,
		que be crey n’er fis jutjaire.