Stronski, Stanislaw. Le troubadour Folquet de Marseille. Genève: Slatkine Reprints, 1968

[CdT en procés d'incorporació]

Code: 009,010 Auteur: Folquet de Marseilla Genre: Chanson de croisade Numero: XVII

Consiros, cum partitz d’amor

I	1	Consiros, cum partitz d’amor,
		chant mesclatz de joy e de plor,
		quar dols e plors e pietatz
		mi ve del comte mo senhor
	5	quez es per Dieu servir crozatz,
		et ai joy quar Dieus l’enansa
		e vol que la crestiandatz
		torn per luy en alegransa,
		e sia·n Dieus grazitz e lauzatz.
		e sia·n Dieus grazitz e lauzatz.
II	10	E pus Dieus per sa gran doussor
		nos baylha tal capdelhador,
		ben es recrezens e malvatz
		qui rema e partitz d’ onor,
		e qui vai grazitz et honratz,
	15	que l’anars es esperansa
		de ben e de joy e de gratz
		e de valor e d’onransa
		e desliuramens de peccatz.
III		Que·l conquist que nostr’ ansessor
	20	conquisteren Terra Major
		perdem qui no·l secor viatz,
		e·ill crotz on Ihesus pres dolor
		e mort, e·y fo per nos levatz ;
		e qui sai rest’ en balansa,
	25	si n’a poder e·l te foudatz
		d’anar a sa desliuransa,
		. . . . . . . , si a Dieu platz.
IV		Qu’aissi cum son princep aussor
		e Dieus lur a dat mais valor
	30	es qui rema pus encolpatz ;
		e qui, per creysser sa ricor
		quant auzira·ls autres passatz,
		resta, e los dezenansa
		contra Dieu s’es aconselhatz
	35	e Dieus penra en venjansa
		tal qu’e·l corn del taulier n’er matz.
V		Molt devon esser ses paor,
		segur e bon guerreyador
		silh qu’iran, qu’ades er de latz
	40	Saint Jorgi, e Dieus er ab lor,
		que los a absoutz e mandatz ;
		e qui murra, ses doptansa
		er e·l cel martir coronatz,
		que·l Senher l’en fay fiansa
	45	qu’es Dieus e Reis e Hom clamatz.
VI		Selh cui Dieus det sen et vigor
		et a de totz bos pretz l’onor,
		qu’es coms et er reys apellatz,
		ajuda premiers e secor
	50	al Sepulcre on Dieus fo pauzatz ;
		e Dieus, per sa gran pitansa,
		si cum es vera Trinitatz,
		lo guid e·ill fass’ amparansa
		sobre·ls fals Turcs desbateiatz.
VII	55	E qui al desliurar non cor
		greu sera per lui desliuratz,
		e greu n’aura Dieus membransa
		d’aquelhs per cui es oblidatz,
		que reston a sa pezansa
	60	per mal far e non ges per patz.