Kolsen, Adolf. Trobadorgedichte: Dreissig Stücke altprovenzalischer Lyrik. Halle: Max Niemeyer Verlag, 1925

[CdT en procés d'incorporació]

Code: 388,001 Auteur: Raimbaut Genre: Tenso Numero: 2

Albertet, dui pro cavalier

I	1	Albertet, dui pro cavalier
		Aman doas dompnas valenz
		Gentils e coindas e plazenz,
		Et ambas an bon pretz entier,
	5	E·il cavalier son d'un poder.
		Digatz mi qals deu mai valer
		Per sa domna; qe l'us es drutz
		E l'autr'entendeire saubutz;
		Qals deu esser plus amoros
	10	E plus francs e plus larcs d'andos?
II		En Raembaut, nul consirier
		Non ai d'aquetz dos partimenz.
		Qees deu esser pros e metenz;
		Mas cel q'i entent et enquier
	15	Deu miels amar e metr'aver
		Per zo q'el puescha conquerer
		Sa domn’e·n sia mantengutz;
		Qe drutz, q'a totz sos gaugz agutz,
		Pot ben un pauc mermar sos dos,
	20	Si del cor no·ill mou messios.
III		Albertet, ja·il drut vertadier
		Non faran per lur donnas menz;
		Anz on jois los ten plus jauzenz,
		Son plus larc e plus ufanier.
	25	Qe cel q'a de sidonz plazer
		Deu miels tot bon pretz mantener
		Qe·l vostre q'a sos pretz perdutz
		E sos faigz, don er deceubutz,
		Q'el fai per sidonz em perdos
	30	Si com vos faitz vostras chanzos.
IV		En Raembaut, per cor leugier
		Fan donnas drutz desconoissenz
		Q'eu n'ai vist mains drutz recrezenz,
		Q'eron larc e pro de primier.
	35	Mas sel q'esta em bon esper
		Deu tan son ric pretz far saber,
		Tro sia per sidonz volgutz;
		Qe d'entendenz'es pretz mogutz.
		Q'ieu vic qe·l dalfins fon plus pros
	40	Entendeir', enanz qe drutz fos.
V		Albert, gelos e lauzenger,
		Cui non plai jois ni jauzimenz,
		Diran que bos es vostre senz
		E mi tenran per menzongier,
	45	E·il pro diran tuig q'ieu dic ver;
		Qe si per far e per tener
		E per jazer ab sidonz nutz
		Devi'om esser recregutz
		E per entendre fos plus pros,
	50	Totz temps durer'entencios!
VI		En Raembaut, tuit bon mestier
		Movon de bos entendimenz
		E pretz e valors e jovenz,
		E·l drutz, q'a tot son dezirier
	55	De sidonz, no·n pot plus aver,
		Mas pot sobrefar a lezer
		E esser cobes e menutz,
		E d'aquels avem mais vezutz
		E ai vist mains valenz baros
	60	D'entendenza lares e joios.