Kolsen, Adolf. Trobadorgedichte: Dreissig Stücke altprovenzalischer Lyrik. Halle: Max Niemeyer Verlag, 1925

[CdT en procés d'incorporació]

Code: 016,009 Auteur: Albertet Genre: Canso Numero: 3

Destreitz d'amor veing denan vos

I	1	Destreitz d'amor veing denan vos,
		Bella dompna, querir merce.
		Del desir, que de vos mi ve,
		Me destreing tant, per qu'e us die mon coratge,
	5	E sai qu'ieu fatz ardimen e follatge,
		Car vos enquier ni·us deman vostr'amor,
		E qand ieu pens qui vos etz ni m'albire,
		Sol del pensar n'ai esglai e paor.
II		E car avetz mais de valor
	10	De nuill'autra dompna, c'anc fos,
		Non mi siatz de brau respos,
		S'ie·us demostri lo talan ni·l desire,
		Que·m don'Amors, que m'i fai pieitz d'aucire,
		E s'ieu de ren m'i lassera mon fre,
	15	Per merce·us prec que no m'aiatz salvatge,
		Anz m'escoutatz e ja no·n fassatz re !
III		E qand de mi eus mi sove
		E de la vostra gran ricor,
		Gran temenss'ai e gran paor
	20	Que so qu'ieu dicno·m tengatz ad outratge,
		E s'ieu ai dich orguoill ni vassalatge,
		Perdonatz me; que tant sui envejos
		Qu'ieu no·m puosc plus celar ni escondire
		Del ben qu'e·us vuoill; no·n sai si ja m'er pros.
IV	25	Tenez vil me e maschanzos;
		Depuis no·m voletz far nuill be,
		Failliz que·us plevist, per ma fe,
		Si tot vos etz e bell'e d'aut lignatge.
		Lo bes, qu'e·us voill, es egal del paratge,
	30	E s'eu enanz ne·us dicvostra lausor,
		A vos sui hom et amics e servire;
		Ben mi podetz penre per servidor.
V		Qan vei vostra fresca color
		E·ls vostres bels huoills amoros
	35	E·lbel cor plazentier, joios
		E·ls doutz plazers, que·m sabetz far e dire,
		E la bocha, don tant gen vos vei rire,
		Pot ben tremblar la terra, qui·m soste;
		Qu'e mon cor ai de joi e d'alegratge
	40	Tant que nuills hom no n'es plus rics de me.
VI		E si voletz qu'ie·us prec, per me
		Mout vos enquier a gran temor;
		Car totz hom fai mout gran follor
		Que trop cela son dan e son dampnatge,
	45	E s'ieu celiei mon dan per volpillatge,
		Dompn', ar sai ben quez ieu fatz d'un dan dos.
		Ara sapchatz la dolor e·lmartire,
		Don ieu sui tant destreitz et enojos !