Kolsen, Adolf. Trobadorgedichte: Dreissig Stücke altprovenzalischer Lyrik. Halle: Max Niemeyer Verlag, 1925

[CdT en procés d'incorporació]

Code: 448,001a Auteur: Uc Genre: Sirventes Numero: 5a

Dalfin, respondetz me, si·us platz

I	1	Dalfin, respondetz me, si·us platz,
		Totz savis et aconsellatz,
		E s'avez bon'entencio,
		Ar entendetz a ma tenzo,
	5	Qe·us part, e vos avez los datz
		E cauzetz de qatr'amistatz
		La cals val mais segon razo.
II		Cant bona domn'e drutz prezatz,
		Pros et aisiz enves totz latz
	10	E larcs e de gran messio
		S'amon de bon cor a bando
		Ab cortezi'et ab solatz
		E cascus es totz enseignatz
		D'onor e de pretz e de do
III	15	O cant pros cavaliers valenz
		Met en tozeta sos entenz
		E·ill en vol faire guizardo
		Tal qe de ren no·il ditz de no
		Et es bell'e coind'e plazenz
	20	Et en lui es lo pretz jauzens
		Qe·ls gard amdos de mespreiso
IV		O cant bona domn'avinenz
		Aizid'e pros per amor venz
		Tan c'ama bel tozet e bo
	25	On tota genz a sospeiso
		Et es larcs et ardiz e genz
		Et en leis es l'enseignamenz
		Qe·l deu faire cortes e pro
V		O cant tozet'ab gran beutat
	30	Met en bel tozet s'amistat
		E lor fin cors son de sazo
		E novel'amors los somo
		E lai regn'Amors a son grat
		E son d'un cor e d'un pensat
	35	E Jovenz a son compaigno?