Kolsen, Adolf. Trobadorgedichte: Dreissig Stücke altprovenzalischer Lyrik. Halle: Max Niemeyer Verlag, 1925

[CdT en procés d'incorporació]

Code: 119,001 Auteur: Dalfi d'Alvergne Genre: Sirventes Numero: 5b

Bauzan, car m'avez enseignat

I	1	Bauzan, car m'avez enseignat,
		Trobarai l'enseingn'a vostr'at
		Qe d'aizo, don etz en error,
		Vos esclarzirai la brunor ;
	5	Q'ieu ai lo mestier avezat
		D'amor, e vos tan oblidat,
		Qe re no sabez ves on cor.
II		De catre devizas d'amor
		Me mandatz chauzir la meillor,
	10	Et eu farai o volontiers :
		Be n'estai, cant pros cavalliers
		Conqier donna de gran valor,
		Mais chascus o fai per honor
		E l'onors es coma logiers.
III	15	O cant drutz a totz pretz entiers
		Es per proeza lauzenjers
		Vas tozeta tan c'ab leis jai,
		Ben leu leis no sab bon ni·l plai.
		Mas car a tan valens mestiers
	20	E l'agraz no n'es tan pleniers
		Com a coral amor s'eschai?
IV		Can bona domn'ab pretz verai
		Vas amor de tozet se trai,
		Leis sembla q'en force talanz,
	25	E lor amors non es duranz
		Qe·l tozetz ven e·il dona vai.
		Eu sai ben q'enemics n'aurai,
		Car es tan vertadiers mos chanz!
V		Mas can fis cors e bels semblanz
	30	S'acord'e joves benestanz,
		Lor s'ajost'amors finamen
		Ses retrait de prez e de sen
		Et es fis jois, ses totz enjanz,
		Et amors cui prez es comanz
	35	Fai chascun per yalor valen.
VI		Et am tot'amor avinen,
		Bauzan, mas la plus joyen pren
		E vos avez d'aitan mal dit
		Q'ab l'Ager-en-Ton'ai faillit,
	40	Car l'eslognei de nostra gen ;
		Mas eu n'ai bon razonamen,
		Car sol mos cossins l'enqerit.