Kolsen, Adolf. Trobadorgedichte: Dreissig Stücke altprovenzalischer Lyrik. Halle: Max Niemeyer Verlag, 1925

[CdT en procés d'incorporació]

Code: 124,017 Auteur: Daude de Pradas Genre: Canso Numero: 7

Tan sen al cor un amoros desir

I	1	Tan sen al cor un amoros desir,
		Qu'i an mei oill novellamen assis,
		Qu'ieu non voill ges esser en paradis
		Per so que mais non pogues çai venir,
	5	Lai on beltatz e jovens seignoreia
		E tot aco qu'az Amor plaser deia ;
		Qu'el mon non es nuils hom tan malenans
		Lai non tornes joios e benestans.
II		Be·m saup Amors onrar et enrequir,
	10	Qar anc deignet voler qu'eu m'enardis
		Tan que penses que ma dompna·m suffris
		Qu'eu l'esgardes dreitz huoills al departir.
		Ben sai que ja no n'aurai mais l'enveia
		………………………………. -eia
	15	E me consen sos amoros semblans,
		Be·l cuig mostrar quals es totz mos talans.
III		Be·s fai a dir, so·m cuig; car afortir
		No·s deu om ges, pos Amors l'a conquis ;
		Qar plus vencutz es cel qui s'afortis
	20	Qe cel qe sap humilmen obedir.
		Donc ben es fols qui ab amor guerreia;
		Qar saber pot, si merces no·l plaideia,
		A soffrir l'er sos mals e sos afans
		Tan cum volra cil de cui es comans.
IV	25	Ja, se·m volgues midons del tot aucir,
		Non cuig tan gen m'onres ni m'acuillis
		Ni siei bel oil amoros plen de ris
		No m'aneron tan dousamen ferir
		Mon cor, qe·s ren a leis totz e s'autreia
	30	E parl'ab leis e solatz'e dompneia
		Tot autresi cum s'eu l'era denanz
		E m'agues pres per amie en baisans.
V		Dompna, vostr'om sui per far e per dir.
		Tot can volretz per ma fe vos plevis,
	35	E se·m prendes per tal com ie·us m'ofris,
		Ja Deus no·m don poder qu'aillors m'en vir !
		Ai, douza res, cui ador'e sopleia
		Prez e valors e tot qan es merceia,
		Voillatz, si·us platz, qu'ie·us retraia mos chans
	40	Con eu vos sui e serai fis amans.
VI		A mon amic, qe fai meils tot qan deia
		De nuil baro qez homs auja ni veia,
		T'en vai, chansos, e sias li membrans
		Qe maintas vez val mais uns jorns q'uns ans.