Kolsen, Adolf. Trobadorgedichte: Dreissig Stücke altprovenzalischer Lyrik. Halle: Max Niemeyer Verlag, 1925

[CdT en procés d'incorporació]

Code: 167,055 Auteur: Gaucelm Faidit Genre: Canso Numero: 13

Solatz e chantar

I	1	Solatz e chantar,
		Joy e deport e rire
		Cugei tot laissar
		E viur'a gran martire ;
	5	Mas silh, cuy tenh car
		E cobey e desire
		E dupt e reblan,
		Vol que torn en mon chan,
		Qu'era mortz a son dan,
	10	Ditz, e fai cortezia
		Quar no vol sufrir
		Ma doussa car'amia
		Que'm laisse morir.
II		Quar, si Dieus me gar
	15	Lieys de cuy suy servire —
		E no puesc jurar
		Plus fort per vertat dire —,
		Non pogron durar
		May un jorn li sospire,
	20	Qu'ieu de plan talan
		No moris deziran.
		Per so·lh grazisc chantan
		A la belh', on qu'ieu sia,
		L'onrar e·l servir
	25	E·l joy, que·m ven quec dia
		De lieys, cuy dezir.
III		Be·m dey alegrar,
		Quar silh, que·m vol aucire,
		Mi vol esmendar
	30	Lo mal, don suy sufrire,
		Qu'ab un dous bayzar
		Mi venc al cor assire
		Un ric joy prezan,
		E si·n suy en afan:
	35	Mos Bos-Espers m'a tan
		Donat qu'ieu no·l poiria
		La meytat grazir,
		Si per tostemps vivia,
		Quan be m'o cossir.
IV	40	S'hom per ben amar
		Fo anc d'amor jauzire,
		Be·m deu joyos far
		La bella, don no·m vire ;
		Que vendre o dar
	45	Me pot, e no s'albire
		Qu'autra mi deman.
		Qu'ades, vas on qu'ieu m'an,
		Suy sieus ses tot enjan,
		E si tant s'umelia
	50	Que·m vuelh'enriquir
		D'aquo qu'ieu plus volria,
		Be·m dey esbaudir.
V		Qu'aissi·m fay tremblar
		Ma don'el cor e frire
	55	Qu'ab sol son parlar
		Volf e vir e·n cossire,
		Quan son bel vis clar
		E son geu cors remire
		Dreit e benestan,
	60	Et ai joya tan gran,
		Can mi fay belh semblan
		D'amor ni par que·m ria,
		Qu'ieu re no·lh sai dir
		D'aisso qu'ops me seria ;
	65	Si·m fai joys falhir.
VI		De ben e d'onrar
		Suy a midons grazire
		E dey m'en lauzar.
		Mais d'autra part m'azire ;
	70	Que, si tot nom par,
		Mon senhor suy mentire
		Qu'ieu prec e reblan
		De cor e de talan ;
		Qu'estat n'ai mai d'un an
	75	Et ai fait gran folia ;
		Qu'ab luy aug venir
		Joy e pretz tota via,
VII		Cuy qu'enuey ni tir.
		A Ma-Capa man
	80	En ma chanso chantan
		Ma benanansa gran,
		E lay en Lombardia
		Guar Dieus de falhir
		Ric-de-Joy e s'amia
	85	Tant quant ieu dezir !