Guarnerio, Pier Enea. Pietro Guglielmo di Luserna, trovatore italiano del sec. XIII. Genova: Tipografia di Angelo Ciminago, 1896

Code: 461,104 Auteur: Anonyme Genre: Descort Numero: Appendice

En aiquest gai son e leuger

I	1	En aiquest gai son e leuger
		faz discort sentz alegrança
		de vos, qem tollez alegrer
		e solatz e benenança,
	5	et avez me dat cossirier
		e trebail et malanança.
		Gran peccat farez a sobrer,
		si nom fas qalqe pidança.
		Las, que farai?
	10	qu'ieu no lo sai ;
		pos noi trob nuil bon conort,
		per vos morai
		car mout mi plai,
		s' om diz que vos m'aiaz mort.
II	15	Pero morir non volria,
		si tot es ric' et veraia :
		ni mesters noca n'auria,
		valentz gentils dompna gaia.
		Melz sui onraz
	20	que nuils hom naz,
		sol vostr' amors mis consenta,
		e que sufraz
		qu' enamoraz
		sia per vos, dompna genta.
III	25	Dirai vos con sim pres l'autrier,
		can fui a l'entrar de França,
		del vostre ric cors plazentier.
		orgoillos d'umil senblança.
		Eu n' agui tan gran desirier
	30	al cor et tal alegrança,
		c'ades cengui mon dreit sentier.
		plus drez non es darç ni lança.
		Qar chai ni lai,
		dompn'al cors gai,
	35	non tengui vas autre port
		d'un, don m' esmai
		s'ieu ia m'estrai
		e si avez de mi gran tort.
		Ni per niguna qui sia
	40	non ai cor, que iam n'estraia,
		ne quim des ço qu'eu volria
		e sai ben tal qui m'asaia.
		Merce n'aiaz
		de mi, sius plaz,
	45	car es pros et convinenta ;
		car ben sapchaz
		e m'en creçaz,
		que res tan non m'atalenta.
IV		Ni tan mi plaz
	50	con fai Borlatz
		per la contessa valenta,
		cui preç es datz
		et autreiatz,
		tant qu'il val las meillors trenta.
V	55	Descortz, anaz
		tost & viaz
		a Ben-vengut, q'es manenta.
		de ric solaz,
		pois prez onraz
	60	non a tan bona parenta.