Frank, István. Pons de la Guardia, troubadour catalan du XIIe siècle. "Boletín de la Real Academia de Buenas Letras de Barcelona", 22 (1949), pp. 229-327.

Code: 377,001 Auteur: Pons de la Garda Genre: Canso Numero: I

De chantar dei aver talan

 

I		De chantar dei aver talan
		per joi de lei que vol ma conoisensa ;
		c'ades dei voler de mon chan
		sia volgutz et auzitz en Proensa,
	5	que ben conosc c'a las donas agensa.
		Et ai n'en mon cor joi tan gran,
		per que jauzen chantarai darenan.
II		Per honor ai sufert afan
		… … … … … … … … … … …
	10	c'om en re no pot a ver dan
		pos gent onratz n'es, a ma conoisensa ;
		qu'ieu ai tan aut pojada m'entendensa
		que m'es grans honors, com que·m n'an,
		quar sol sufer qu'ieu s'amor li deman.
III	15	Per so l'am ieu per bona fe,
		de mon poder, si Deu me benezia.
		E l'amor durara·m jase,
		pos a vos platz que·us am, ma bel' amia.
		Amiga·us clam : Dieus vueilla que vers sia !
	20	Don', amigua m'es vos, so cre,
		pos tot lo joi me das qu'ieu ai ab me.
IV		Qui la·m mentau, tal joi m'en ve,
		mos amicx es totz hom que re m'en dia,
		e vueill i'en ins en mon cor be
	25	mas no l[i] aus mostrar meillor partia,
		ans fauc semblan que d'autre joc me ria.
		E s'ieu de parlar me refre,
		lai tenc lo cor on n'aug retraire re :
V		Ab lei, que m'a fag tan d'onor
	30	que bon m'en es lo parlar e·l dezire,
		e bon quan pens de sa valor ;
		e quan la vei, meillor qu'ieu no sai dire,
		qu'ieu soi plus bels quan sa beutat remire.
		E car ja tenc mos hueils aillor,
	35	per trop temer ho fauc e per paor.
VI		Tostems m'aun fait lauzenjador
		mal et envei, Damidieus los azire !
		Trops n'i a mals, mas un pejor :
		c'aisel me vol de tot en tot ausire.
	40	Mas bon conort n'ai, quan be m'o consire,
		c'anc per lauzengiers bon' amor
		no vim faillir. Mas no renia en lor.