Branciforti, F.. Le rime di Bonifacio Calvo. Catania: Università di Catania. Biblioteca della Facoltà di Lettere e Filosofia, 1955

[CdT en procés d'incorporació]

Code: 101,014 Auteur: Bonifaci Calvo Genre: Canso Numero: IV

Tant auta dompna·m fai amar

I	1	Tant auta dompna·m fai amar
		Amors e qu'es tan bell'e pros,
		que sol deingnes de dezirar
		s'amor non sui; ni vol razos,
	5	-tant sobreval!- que·il plaia qu'eu
		l'am ges, ni que m'autrei per sieu:
		mas sai bes que de lleis m'eschai
		per dreig l'affanz e·l mals qu'eu n'ai.
II		Si tot s'es de tot be sens par,
	10	tant l'am e tant sui volontos
		de lleis servir et d'esauzar
		son prezat pretz totas sazos,
		que l'afan gran e·l malrag grieu,
		qu'eu n'ai, pois non mier autre feu,
	15	m'autrei'a razon, e non sai,
		tot mo autrei si trop dig ai.
III		Mas ben crei que trop derreiar
		m'a faig sos finz pretz cabalos,
		que·m fai del meu turmen pagar
	20	tant, que non es ma sospeizos
		que sia bes que vailla·l mieu
		maltrag; e s'aitan dig que·l grieu,
		vailla·m rnerces, car tam ben n'ai,
		que de celar poder non ai.
IV	25	No·m puosc tener de parven far
		com sui benananz e ioios,
		car Amors m'a volgut honrar
		mais d'amador c'anc el mont fos.
		E dirai trop, o non ben leu,
	30	que, si plagues amar a Dieu
		dompna del mon, avinen plai
		auri'en leis, que chausid'ai.
V		Car val mais c'om non pot pensar
		lo reis de Castella n'Anfos,
		sui seus, car sa valors m'empar,
		s'er qui trop senbla orgoillos;
		e si·l plai que·m puege ni·m leu,
		non voill aillors querre manleu,
		c'ab sa valor dir auzarai
		daus on mi ve l'affanz qu'eu ai.