Branciforti, F.. Le rime di Bonifacio Calvo. Catania: Università di Catania. Biblioteca della Facoltà di Lettere e Filosofia, 1955

[CdT en procés d'incorporació]

Code: 101,009 Auteur: Bonifaci Calvo Genre: Sirventes Numero: V

Mout a que sovinenza

I	1	Mout a que sovinenza
		non agui de chantar;
		mas ar me·n sove, car
		aug sai dir e coindar
	5	que·l nostre reis breumenz,
		cui que pes ni·s n'azir,
		vol en Guascoign'intrar
		ab tal poder de genz,
		que murs ni bastimenz
	10	non o posca suffrir.
II		E car ai entendenza
		qu'el vol faig comensar,
		don poiran luec cobrar
		armas e coindeiar,
	15	sui, tan gais e iauzenz,
		qu'eu non penz ni consir
		mas de ioi e de far
		zo, per que tost comenz
		lo francs reis e valenz
	20	ab ferm cor de complir.
III		Per que chantan m'agenza
		sa grant valor sonar,
		c'ar comenz senz tardar
		de sos dreitz demandar
	25	tant afortidamenz,
		que senz tot contradir
		li Gascon e·ill Navar
		fasson sos mandamenz
		e los liur'a turmenz
	30	ab prendr'e ab aucir.
IV		Veiranlo senz bistenza
		dreg vas els cavalgar
		ab tal esfors, que·l par
		non puesc'en champ trobar
	35	e lai tant bravamenz
		conbatr'e envazir
		murs, tors e peceiar,
		ardr'e fondr'eissamenz,
		que·ls fass'obedienz
	40	a sa merce venir.
V		Si que de sa valenza
		fassa·ls meillors parlar;
		e pe·l paire senblar
		si deu mout esforçar,
	45	car fon plus avinenz
		e mais saup conquerir
		e mais si fetz honrar,
		que reis qu'anc fos vivenz;
		car, si no·l senbl'o·l venz,
	50	pro hi auran que dir.
VI		Mas res no·m fai doptar
		qu'el no·l vencha breumenz,
		tant es granz sos talenz
		de son pretz enantir.
VII	55	Reis castellanz, pueis ar
		no·us faill poders ni senz
		e Dieus vos es consenz,
		pensatz del conquerir.