Branciforti, F.. Le rime di Bonifacio Calvo. Catania: Università di Catania. Biblioteca della Facoltà di Lettere e Filosofia, 1955

[CdT en procés d'incorporació]

Code: 101,002 Auteur: Bonifaci Calvo Genre: Lai Numero: IX

Ai, Dieus! S'a cor qe·m destreigna

I	1	Ai, Dieus! S'a cor qe·m destreigna
		l'amors tant, c'a mort en veignha,
		om sufrira qe·m sosteinha
		tro que plazers mi reveingna.
	5	Vaus lieis, c'ab prez verai teignha,
		non o sai: mais l'entreseinha
		m'esmaia, con que·s capteignha
		de mi, q'aissi·m par m'estreignha,
		que·l cor mi frainh'e·m esteigna.
	10	Per que ilprec de mi·l soveigna
		sivals d'aitan, que no·m teingna
		tant fort destreg; car eu seingna
		non ai d'esfortz qe·m reteigna
		tan, que morir no·m coveigna,
II	15	se no·m alevia·l martire
		dont nueg e iorn soi sofrire;
		pero si del tot aucire
		mi vol, no·ilsai als que dire,
		mas que murai sos servire.
	20	No·m pot mal far per qu'eu vire
		de leis servir mon desire,
		car si·m dueil, ges no·m azire
		vas lieis, car pes e consire
		que per la gensor que·s mire
	25	mi don'afan e consire;
		ans, can dinz mon cor remire
		son douz vis e son gen rire,
		de grant plazer sui iauzire,
		sitot languisc e suspire,
	30	car chauzimenz n'es a dire.
III		Mas s'il auzis,
		con li sui fis
		e leials ses tot cor vaire,
		non crei sufris
	35	c'aissi languis
		finz amanz e merceiaire.
		Mas non l'es vis
		qe·il si'aclis
		con sueil, car ieu non repaire
	40	vas son pais
		con li promis:
		e per so·m liur'ab maltraire,
		on plus li sui fiz amaire.
IV		Ja de si no m'an
	45	lueinhan,
		si trebailan
		mi vauc ar sai en Espaignha
		com m'enpeinh'enan,
		puian
	50	ma valor tan
		que sos valenz pretz no·s fraingnha,
		ni·s dechaia, can
		semblan
		petit ni gran
	55	fassa, que vas mi s'afraingna;
		car, a lei d'aman,
		de dan
		la vauc gardan
		en tot que·s coven e·s taignha.
	60	Que res non es qe·m sofrainha,
V		ni lais'a far,
		a ben amar
		e finamen;
		e ia non m'en
	65	puesc'alegrar,
		s 'enianz mi pot escoscendre,
		ni·l cor caniar
		ni far lueinhar
		lo pensamen
	70	d'aisso qe·m ten.
		E sai pensar
		qe·l deinhe e vueill'en grat prendre,
		qan mon afar
		sapch'e·l pessar
	75	qu'eu per so pren,
		que tan granmen
		no·m puesc'honrar
		con taingn'al mieu aut entendre.
		E car no·m par
	80	qu'estiers mostrar
		li puesca gen
		con l'am fortmen,
		li tramet ar
		mon lais per far li entendre
	85	l'amor que·il port, e aprendre;
VI		car non crei, pois qu'il entenda
		con l'am, c'a merce no·m prenda,
		e que, senz tota contenda,
		de grat s'amistat no·m renda
	90	per acort e per emenda.