Branciforti, F.. Le rime di Bonifacio Calvo. Catania: Università di Catania. Biblioteca della Facoltà di Lettere e Filosofia, 1955

[CdT en procés d'incorporació]

Code: 101,010 Auteur: Bonifaci Calvo Genre: Sirventes Numero: X

Per tot zo c'om sol valer

I	1	Per tot zo c'om sol valer
		e esser lausatz
		desval et es encolpatz,
		c'ar es proessa folia
	5	e leialtatz non-sabers
		e gaieza leviaria:
		c'aissi es camiatz valers
		en avoles'e il en lui, qu'om te
		lo croi per pro e que·l pros non val re.
II	10	E sitot ieu ai saber
		de far malvestatz,
		per q'eu seria prezatz
		et en poder puiaria,
		conoissenza e devers
	15	mi capdellon totavia
		de guiza, que mos volers
		no·m sofre ges que·m plaia fais, per que
		mi prezon cil que·l mal tenon per be.
III		Anz voill ab aital voler
	20	meinz poder assatz,
		que dels crois mal enseingnatz,
		ples de tota vilania,
		no·m plai en re lurs plazers
		ni lur mendiga paria;
	25	car mi par lur chapteners
		tant laitz e tant aunitz que, per ma fe,
		qan sovinenza n'ai, m'enueg de me.
IV		E sai qu'eu farai parer
		ab mos ditz serratz
	30	qe·m lau con outracuidatz;
		non a totz, que, s'o fazia,
		de messoini'auria·l vers
		senblanç'e tant se valria.
		Mas si tot no·m faill lezers,
	35	ges de chantar no·m menbra, ni·m sove,
		mas sol per cels qu'entendemenz soste.
V		Dompna, tan mi fai plazer
		bels faitz e honratz
		lo senz e la granz beutatz
	40	la valors e·l cortesia
		de vos, que res, fors poders,
		no·m sofraing a far que sia
		perdutz l'auzirs e·l vezers
		e·l senz dels avols, per cui s'esdeve
	45	c'om lau celui, c'avinen no·s capte.