Branciforti, F.. Le rime di Bonifacio Calvo. Catania: Università di Catania. Biblioteca della Facoltà di Lettere e Filosofia, 1955

[CdT en procés d'incorporació]

Code: 101,001 Auteur: Bonifaci Calvo Genre: Sirventes Numero: XII

Ab gran dreg son maint gran seingnor del mon

I	1	Ab gran dreg son maint gran seingnor del mon
		sempre de bos servidors sofraichos;
		et ab gran dreg prendon maintas sazos
		danz e destrics, quan se·n pogran gandir;
	5	et ab gran dreg faillon a conquerer
		terras e gent, qan n'an cor e voler:
		car an mes tot zo, per qu'om vai pueian
		en honrament et en pretz, en soan.
II		E car il tan senz tota valor son,
	10	non dur'ab els servire fiz ni bos,
		car s'esdeve, sia tortz o razos,
		que cascuns vol l'us aprendr'e seguir
		de son seingnor, per miels ab lui caber;
		doncs si fezesson aissi lur dever
	15	li croi seingnor, com il se·n van loingnan,
		grieu aurion servidor mal obran.
III		E sol per zo si dechai e·s cofon
		lo segl'e·s pert, car il son nuaillos
		e nonchalen de totz faitz cabalos;
	20	e·m meravil com pot esdevenir
		qu'il no voillan proeza mantener,
		car ab proeza pueion en poder
		et en ricor, don tan grant talen an;
		per qu'eu me·n vauc trop fort meraveillan.
IV	25	Car totz seingner on mais a cor volon
		d'aver mais e d'esser mais poderos,
		de valer deu esser mais volontos
		e de tot zo que fassa·ls pros grazir
		e maiorment de dar, car fai tener
	30	per pro maint hom a pauc d'autre saber
		e de tot autra valor, sol q'enan
		que·l don, si gart qu'o met'en luec prezan.
V		E s'om prezatz que don pren, no i respon
		gent cant obs es, l'onors e·l pretz e·l pros
	35	que·n ven celui per cui faigz es lo dos,
		restaura tot, car chascuns, qe l'au dir,
		si·s preza ren, ni sab en re valer,
		a tan bon cor vas lui, com degr'aver
		cel, que n'a pres lo don; per qu'az afan
	40	no·s deu nuls hom tener dar si onran.
VI		Als seingnors cug aver faig gran plazer
		en aquest chant: als pros per mantener
		lur bel capteing et als autres mostran,
		s'il volon far lur pron, zo qu'a far an.