Branciforti, F.. Le rime di Bonifacio Calvo. Catania: Università di Catania. Biblioteca della Facoltà di Lettere e Filosofia, 1955

[CdT en procés d'incorporació]

Code: 101,007 Auteur: Bonifaci Calvo Genre: Sirventes Numero: XVII

Ges no m'es greu s'eu non sui ren prezatz

I	1	Ges no m'es greu s'eu non sui ren prezatz
		ni car tengutz entr'esta gen savaia
		genoeza, ni·m platz ges s'amistatz,
		car no·i cab hom a cui proeza plaia;
	5	mas ab tot zo mi peza fort qu'il es
		desacordanz, car s'il esser volgues
		en bon acort, sos granz poders leumen
		sobraria totz cels per cui mal pren.
II		Hai, Genoes, on es l'auz pretz honratz
	10	qu'aver soletz sobre·l gen, que par qu'aia
		totz vostres faitz decazutz e sobratz
		tan fort que totz vostr'amics se·n esmaia?
		Sia·l descortz, qu'entre vos es, ios mes,
		e donatz vos luec a tornar los fres
	15	en las bochas de cels, que, per conten
		qu'avez mest vos, si van desconoissen.
III		Mas lo contenz es tant mest vos poiatz,
		que, s'el non chai, greu er que no·us dechaia,
		qu'om vos guerreia, e vos vos guerreiatz.
	20	E qui vos venz ar, no·s cug que·l n'eschaia
		laus ni bos pretz, car no·us platz vostres bes,
		que l'us a gaug quant a l'autr'es mal pres:
		doncs qui venz tan descabdelada gen,
		non fai esfortz don pueg em pretz valen.
IV	25	E si no fos la follors e·lpeccatz
		que nais del vostre descort, tals s'asaia
		leumen a far zo que mais vos desplatz,
		que·us for'aclis, car res tant non esglaia
		vostres guerrers ni tant lor desplai ges
	30	con faria·l vostr'acortz, s'el pogues
		entre vos tant durar enteiramen
		que poguessetz d'els penre veniamen.
V		Car il sabon que leger no·us donatz
		de vos veniar, mostron que lur desplaia
	35	zo, que pro vetz los avetz malmenatz,
		tant, que greu es luecs, on hom no·l retraia,
		que trenta d'els non esperavon tres
		de vos; per c'ab pauc non es Dieus repres,
		car de tal guiza vos a tout lo sen
	40	que·us sobron cil que no valon nien.
VI		Venecian, ben sapchatz qu'obs vos es
		que si'ab vos Dieus contra·ls Genoes,
		car, ab tot zo qu'El vos hi val granmen,
		vos an il tout tant que·n vivetz dolen.