Branciforti, F.. Le rime di Bonifacio Calvo. Catania: Università di Catania. Biblioteca della Facoltà di Lettere e Filosofia, 1955

[CdT en procés d'incorporació]

Code: 101,008a Auteur: Bonifaci Calvo Genre: Tenso Numero: XVIII

Luchetz, se·us platz mais amar finamen

I	1	Luchetz, se·us platz mais amar finamen
		vostra domna et esser desamatz
		tos temps per leis, on plus finz li siatz,
		q'aver ab gien et ab galiamen
	5	s'amor conques et ab tota falsura,
		sapcha·l per vos; o s'ets mais voluntos
		d'aver s'amor conqes ab tracios,
		qe de languir finz per sa desmesura.
II		Bonifaci, desegal partimen
	10	sabes partir, q'enianz e lejautatz
		no·s fan ensems, ni partir no·ls degratz,
		al mieu semblan, enaissi engalmen:
		pero eu prenc amar senes frachura
		e senz tot fallimen con finz e bos,
	15	e·l ioi d'enian lais als fals amoros,
		qe fan semblan d'aizo don non an cura.
III		Luchetz, aqel qe fai parer fegnen
		q'es amics douz et amics afinatz
		per tal q'amdui n'aian ioi e solatz,
	20	sab mais qe cel q'a ben amar s'empren
		ab tal parer, qe merces e mesura
		faill'en sidonz, quan no sia razos,
		e q'el tos temps dei'esser rancuros
		de leis, car lo desam senes drechura.
IV	25	Bonifaci, finz amanz iauzimen
		non pot penre d'enianz ni de baratz;
		or es nientz zo q'aves razonatz,
		c'om d'enjanar sa domna fassa sen:
		qe fiz amics, pueis finamen s'atura,
	30	non deu voler, si tot ser em perdos,
		traïr sidonz, ni l'es iois saboros,
		si no·l conqer ses tota forfachura.
V		Cel qe sa domn'enjana, conoissen
		q'il en reman iauzenz et el pagatz,
	35	fai qe savis, e cel es fols proatz,
		c'ancse languir vol, aman leialmen,
		car dreitz non manda ni consen natura
		c'om serv'ab desesper, Luchetz, e vos,
		s'o volretz far, no·i seretz poderos,
	40	mentr'ajatz sen ni conoiscenza pura.
VI		Cel q'enjana sa donn'a escien
		mier piegz de mort, Bonifaz'e·l percatz
		li val fort pauc, car non pot venir gratz
		d'amor en cor qe non am coralmen:
	45	doncs per nien sa domn'e si peiura,
		q'el l'enjana, si tot sec son vol blos.
		E·l finz sivals es de ric ioi ioios,
		car si sent finz e leials senz rancura.
VII		Aqel leials, don nos avem conten,
	50	Luchetz, es fols s'el non es mais iratz
		qe iauzenz, qar non es maier foudatz
		con amar fort en luec desavinen,
		car hom non pot aver bonaventura,
		ni n'es lauzatz; e cel es tengutz pros,
	55	qal qe sia, c'ab semblan cabalos
		conqier dona humil o brav'e dura.
VIII		Totz iois dechai e torn'en gran rancura,
		Bonifaci, cant no·l soste razos;
		per qe·l fals iois, don vos es volontos,
	60	non pot plazer a ma voluntat pura.
IX		Mantenen tort e zo don non ai cura,
		vos ai vencut, Luchetz; don sui ioios,
		car ai mostrat q'eu sai tan plus de vos,
		c'ab tort conten miels qe vos ab drechura.