Linskill, Joseph. The Poems of The Troubadour Raimbaut de Vaqueiras. The Hague: Mouton & Co

Code: 392,009a Auteur: Raimbaut de Vaqueiras Genre: Sirventes Numero: XX

Sirventes

I	1	Conseil don a l’emperador,
		pois per conseil fai totz sos plais,
		e non faria meins ni mais
		mas tant con sei conseillador
	5	li volun far dir’ e faire:
		e·il conseil, s’el vel esser pros,
		qe don, sens conseil, derenan;
		e, ses conseil ab sos baros,
		creza·l conseil del plus prezan,
	10	q’aissi ‘s conseils d’emperaire.
II		Pueis eu li conseil sa honor,
		creza m’en, si·o vol, o s’en lais;
		e se·l senescal no·s n’irais
		ni Coine del cosseil major,
	15	eu serai bos cosseillaire,
		e darai conseil a els dos,
		qant lur segnor consseillaran,
		qe·il cosseillen de far rics dos;
		mas no sai s’amdos m’en creiran,
	20	ni eu no·ls en forzi gaire.
III		E si no·s meillur’ en la flor,
		lo frugz poiri’ esser malvais;
		e gart se q’al seu tort non bais,
		qe pujatz es en grant honor,
	25	et es bels e de bon aire;
		e se val creire mos sermos,
		ja no·i aura anta ni dan,
		anz sera granz honors e pros,
		car se pert cels c’ab lui estan,
	30	tart venran de son repaire.
IV		E non tema freg ni calor,
		ni·s baign ni sojorn em palais,
		qe al col a cargat tal fais
		qe, s’el non es de gran valor,
	35	greu lo poira a cap traire;
		qe li Blac e·il Coman e·il Ros
		e·il Turc e·il Paian e·il Persan
		seran contra lui ab Grifos;
		e si per pretz non trai afan,
	40	tot qant a faig pot desfaire.
V		Q’el e nos em tuig pecchador
		dels mostiers ars e dels palais,
		on vei pecar los clercs e·ls lais;
		on vei pecar los clercs e·ls lais;
		e se·l sepulchre non secor,
	45	serem vas Dieu plus pechaire,
		q’en pechat tornara·l perdos,
		e se·l conqis no ’stai enan;
		mas s’el es larcs ni coratjos,
		ben leu pot anar osteian
	50	a Babiloni’ e al Caire.
VI		Tota sa forz’ e sa vigor
		taign qe mostr’ als Turcs part Roais,
		qe tuit li soudan e·il alcais
		e·il amirail e·il almassor
	55	n’esperan lansar e traire;
		et er n’encolpatz Nevelos,
		e·ls doz’ electors blasmaran,
		se·l sepulchr’ es mais en preizos;
		e·l dux n’er apellatz d’enjan
	60	si·l vol del socors estraire.
VII		Al marescal voil retraire
		mon cosseil, q’es leials e bos;
		mas lui, e Miles de Burban,
		blasmarai se non es fort pros
		. . . . . . . . . . . . . . . . . . . . . . . . .
	65	e larcs e francs l’emperaire.