Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,002 Auteur: Peire Vidal Genre: Canso Numero: XX

Ajostar e lassar

I	1	Ajostar    e lassar
		Sai tan gen motz e so,
		Que del car    ric trobar
		No·m ven hom al talo,
	5	Quan n'ai bona razo.
		Mas auci    m'enaissi
		La bela de cui so,
		Com s'eu fes mespreizo
		Vas leis o tracio.
	10	Quan la vi    si·m feri
		Mon coratge gloto,
		Qu'ades ponh el seu pro,
		E no·m fai si mal no.
		Mal mi vol e no sai per que,
	15	Mas sol quar am leis mais que me.
II		Assatz par    que lonhar
		Me volc de sa regio,
		Quan passar    me fetz mar,
		Per qu'eu la·n occaizo.
	20	Mas non ai sospeisso,
		Que·l servi    ab cor fi
		Tan quan poc a bando,
		E non aic gazardo,
		Mas sol d' un pauc cordo.
	25	Si aigui    qu'un mati
		Intrei dins sa maizo
		E·lh baizei a lairo
		La boca e·l mento.
		So n'ai agut e no mas re,
	30	E sui tot mortz, s'ilh plus rete.
III		Sospirar    e plorar
		Mi fai mainta sazo,
		Qu'alegrar    e chantar
		Volgra mais si·l fos bo ;
	35	Mas cor a de drago
		Qu'a me di    mal e ri
		Als autres deviro,
		E·m fai olh de leo :
		Per aital sospeisso
	40	Fetz de mi    pelegri,
		Qu'anc romeus d'orazo
		Mais tan forsatz no fo.
		E qui·l ver en despo,
		Totz hom deu percassar son be,
	45	Ans que mals senhers lo malme.
IV		Abrazar    e cremar
		Me fai com focs carbo.
		Quan l'esgar    tan vei clar
		Sos olhs e sa faisso,
	50	Que no sai garizo,
		Si·m cambi    ni·m desvi
		D'amar leis —Ai baro !
		Co·m ten en sa preizo
		Amors, que Salamo,
	55	E Davi    atressi
		Venquet e·l fort Samso
		E·ls tenc en son grilho,
		Qu'anc non ac rezemso
		Tro qu'a la mort, e pos mi te,
	60	Ad estar m'er a sa merce.
V		Esperar    e muzar
		Me fai coma Breto,
		Qu'anc l'amar    ni l'onrar
		No·l mis en contenso.
	65	Ans, si Deus mi perdo,
		M'en parti    de tal qui
		M'agra dat tan ric do,
		Que·l bos reis d'Arago
		For' onratz ; e doncs co
	70	Me faidi ?    Qu’e·us afi,
		Quan n'aug dir bon resso,
		Gaugz entiers me somo
		Qu'en deja far chanso.
		E doncs pos tan l'am e la cre,
	75	Ja no dei trobar mala fe.
VI		Pos pauzar    ni finar
		No posc nulha sazo,
		Retornar    et anar
		M'en volh ad espero
	80	Entr' Arle e Tolo
		A tapi,    quar aqui
		Am mais un pauc cambo,
		Qu'aver sai Lodaro
		Ni aver lo Toro
	85	Ni Beli : mas faiti
		Fals lauzengier gloto
		M'an moguda tenso
		E lonhat del peiro,
		E·N Drogomans no m'au ni·m ve,
	90	Quar mon Car Amic part de se.
VII		A mon amic Folco
		Tramet lai ma chanso
		Que la chant en bon loc per me,
		Al tenen on joi vai e ve.
VIII	95	Mal astre Deus li do,
		Qui·l comte d'Avinho
		Mesclet tan malamen ab me,
		Per que Na Vierna no·m ve.