Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,043 Auteur: Peire Vidal Genre: Canso Numero: XXII

Si·m laissava de chantar

I	1	Si·m laissava de chantar
		Per trebalh ni per afar,
		Ben leu dirian las gens
		Que non es aitals mos sens
	5	Ni ma galhardia,
		Com esser solia.
		Mas be·us posc en ver jurar,
		Qu'anc mais tan no·m plac jovens
		Ni pretz ni cavalaria
	10	Ni domneis ni drudaria.
II		E s'eu podi'acabar
		So que m'a fait comensar
		Mos sobresforcius talens,
		Alixandres fo niens
	15	Contra qu'eu seria :
		E s'a Deu plazia,
		Que m'en denhes ajudar,
		Ja·l seus verais monumens
		Lonjamen non estaria
	20	Sotz mal serva senhoria.
III		Hom no·s deuria tarzar
		De ben dir e de melhs far
		Tan quan vida l'es prezens :
		Que·l segles non es mas vens,
	25	E qui plus s'i fia
		Fai major folia :
		Qu'a la mort pot hom proar
		Com pauc val aurs als manens :
		Per qu'es fols qui no·s castia
	30	E non renh' ab cortezia.
IV		Mas tant ai de que pensar
		Qu'eu no posc ben desliurar
		Totz mos honratz pensamens.
		Pero bos comensamens
	35	Mostra bona via,
		Qui no s'en cambia.
		Mas eu per sobresforsar
		Cug dels felos mes crezens
		En breu recobrar Suria
	40	E Damasc e Tabaria.
V		Qu'eu non aus desesperar
		A lei d'un rei flac avar,
		Cui sobra aurs et argens,
		E cuja, quar es manens,
	45	Qu'autre Deus no sia
		Mas sa manentia,
		Qu'avers lo fai renegar;
		Mas quan venra·l jutjamens,
		Car comprara sa feunia
	50	E l'enjan e la bauzia.
VI		Ar m' er mon chant a virar
		Vas ma domna cui tenc car
		Plus que mos olhs ni mas dens :
		Ni no posc esser jauzens,
	55	Si leis non avia.
		Aissi·m lass' e·m lia
		Ab prometre ses donar
		Qu'autre gaugz no m'es plazens,
		Ni ges de lieis no·m poiria
	60	Partir, neis si m'aucizia.
VII		Tant es doussa per amar
		E bela per remirar
		E cortez' e conoissens,
		Si qu'a·ls pros et a·ls valens
	65	De bela paria ;
		Que si ver dizia,
		Al mon non auria par.
		Mas fraitz m'a tals mils covens,
		Que, s'un sol m'en atendia,
	70	Estort e garit m'auria.
VIII		Na Vierna, com que sia,
		Eu sui vostres tota via.