Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,024 Auteur: Peire Vidal Genre: Canso Numero: XXIII

Ges pel temps fer e brau

I	1	Ges pel temps fer e brau
		Qu'adutz tempiers e vens,
		Don torba·ls elemens
		E fa·l cel brun e blau,
	5	No·s camja mos talens,
		Ans es mos pensamens
		En joi et en chantar,
		E·m volh mais alegrar,
		Quan vei la neu sus en l'auta montanha,
	10	Que quan las flors s'espandon per la planha.
II		Domna, de vos mi lau,
		Quar etz douss' e plazens
		E la plus avinens
		Que negus hom mentau :
	15	Que·l vostr' ensenhamens
		Vos fai als conoissens
		Ben dir e tener car
		Et a mi tant amar,
		Que·l cors e·l sens me ditz qu'ab vos remanha,
	20	E si·m faitz mal, qu'ad autra no m'en planha.
III		De lai on venh ni vau,
		Sui vostres bendizens
		E sers obediens,
		Com cel qu'ab vos estau,
	25	Per far vostres talens ;
		E ja·l francs chauzimens
		No·m deuria tarzar
		So que·m fai esperar :
		Que pos Artus an cobrat en Bretanha,
	30	Non es razos que mais jois mi sofranha.
IV		Car qui vos ve ni·us au
		No pot esser dolens
		Per negus marrimens.
		Ai ! domna, tan suau
	35	M'apodera e·m vens
		Vostra cara rizens
		Que quan vos aug parlar
		No posc mos olhs virar.
		Tan m'abelis vostra bela companha
	40	Que d'autra m'es salvatja et estranha.
V		Amors e jois m'enclau
		Et amezura·m sens,
		E beutatz e jovens
		M'alegra e m'esjau,
	45	E·l francs cors gais e gens
		M'es de totz mals garens.
		Bel ris ab dous esgar
		Me fan rir' e jogar,
		Cortes solatz me reten e·m gazanha
	50	E gaugz entiers me tol trebalh e lanha.
VI		De lai on creisso·l fau
		Mi ven us jauzimens,
		Don sui gais e jauzens,
		Qu'onra·l nom de Peitau,
	55	E ja·l fals recrezens,
		Cobes mal despendens,
		No pot re conquistar
		Per soven penchenar.
		Sitot si penh ni·s mira ni s'aplanha,
	60	Totz sos afars no val una castanha.
VII		Que·l cor a flac e cau
		E val meins que niens ;
		Que per mil sagramens
		No·l creiri' om d'un clau.
	65	E dolon m'en las dens,
		Quan parli d'aitals gens
		— Per qu'eu m'o lais estar —
		D'En Saüc, filh d'Albar,
		On malvestatz se sojorna e·s banha,
	70	E sos pretz es aitals com fils d'aranha.
VIII		Al rei valent e car
		Volh en mon vers mandar
		Que, si sai pert Proensa, pauc gazanha
		Pel bel sojorn que pren lai en Espanha.
IX		Fraire, rir' e jogar
		Solh per vos e chantar,
		Mas er es dreitz qu'en sospir e que·m planha,
		Quar vostr' amors m'es salvatj' et estranha.
		Bels Sembelis, per vos am mais Serdanha.