Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,004 Auteur: Peire Vidal Genre: Canso Numero: XXIV

Anc no mori per amor ni per al

I	1	Anc no mori per amor ni per al,
		Mas ma vida pot be valer morir,
		Quan vei la ren qu'eu plus am e dezir
		E re no·m fai mas quan dolor e mal.
	5	No·m val be mortz, et ancar m'es plus greu,
		Qu'en breu serem ja velh et ilh et eu :
		E s'aissi pert lo meu e·l seu joven,
		Mal m'es del meu, e del seu per un cen.
II		Bona domna, vostr' ome natural
	10	Podetz, si·us platz, leugierament aucir :
		Mas a la gen vo·n faretz escarnir
		E pois auretz en peccat criminal.
		Vostr' om sui be, que ges no·m tenh per meu,
		Mas be laiss' om a mal senhor son feu ;
	15	E pois val pauc rics hom, quan pert sa gen,
		Qu'a Daire·l rei de Persa fo parven.
III		Estiers mon grat am tot sol per cabal
		Leis que no·m denha vezer ni auzir.
		Que farai doncs, pos no m'en posc partir,
	20	Ni chauzimens ni merces no m'en val ?
		Tenrai m'a l'us de l'enoios romeu,
		Que quier e quier, car de la freida neu
		Nais lo cristals, don hom trai foc arden :
		E per esfortz venson li bon sufren.
IV	25	Anc mais no vi plag tan descomunal,
		Que quant eu cre nulha ren far ni dir,
		Qu'a leis deja plazer ni abelir,
		Ja pois no pens de nulh autre jornal.
		E tot quan fatz par a leis vil e leu,
	30	Qu'anc per merce ni per amor de Deu
		No posc trobar ab leis nulh chauzimen ;
		Tort a de mi e peccat ses conten.
V		Aissi m'en sui gitatz a no m'en cal,
		Com lo volpilhs que s'oblid' a fugir,
	35	Que no s'auza tornar ni·s pot gandir,
		Quan l'encausson sei enemic mortal.
		No·i sai conort, mas aquel del juzeu,
		Que si·m fai mal, fai lo ad eis lo seu ;
		Aissi com cel qu'a orbas se defen,
	40	Ai tot perdut, la fors' e l'ardimen.
VI		Doncs que farai ? sufrirai per aital,
		Co·l pres destreitz, cui aven a sufrir
		Que li fai mal, mas ben saupra grazir
		Qui·m fezes ben en loc d'amic leial.
	45	Quar s'eu volgues, domna, per autrui feu
		Honrat plazer agra conquist en breu.
		Mas res ses vos no·m pot esser plazen
		Ni de ren al gaug entier non aten.
VII		Lai vir mon chant, al rei celestial,
	50	Cui devem tug onrar et obezir,
		Et es be dreitz que l'anem lai servir
		On conquerrem la vid' esperital :
		Que·l Sarrazi desleial, canineu,
		L'an tout son regn' e destruita sa pleu,
	55	Que sazit an la crotz e·l monumen :
		Don devem tug aver gran espaven.
VIII		Coms de Peiteus, de vos mi clam a Deu
		E Deus a me per aquel eis coven,
		El de sa crotz et eu de mon argen.
IX	60	Coms de Peiteus, bels senher, vos et eu
		Avem lo pretz de tota l'autra gen,
		Vos de ben far et eu de dir lo gen.