Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Introduction
* Notice Bibliographique
* Vocabulaire

* Présentation
* Appareil critique
* Traductions

Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,048 Auteur: Peire Vidal Genre: Canso Numero: XXVI

Tan mi platz jois e solatz

I 1 Tan mi platz    jois e solatz
    D'omes onratz,    per qu'eu fatz
       Tal chanso viatz,
    Bos reis, que prec qu'aprendatz.
       E si·m demandatz :
    Tan soven per que chantatz ?
    Car es enoitz als malvatz
    E gaugz a nos envezatz.
     
II   E sapchatz,    s'eu fos amatz,
    Que n'auziratz    esmeratz
       Chantarets prezatz.
    Qu'era que sui malmenatz,
       Fatz meravilhatz
    Motz ab us sonetz dauratz,
    E no m'en val amistatz
    Ni no chan mas de percatz.
     
III   Cors delgatz,    gen faissonatz,
    Merce n'ajatz.    Pietatz,
       Vos la·n conselhatz,
    Que destreitz sui e cochatz.
       Ai ! domn', esgardatz
    Mon cor e no m'auciatz,
    Qu'enjans e tortz e peccatz
    Er, s'eu mor dezesperatz.
     
IV   Melhs pagatz    fora qu'om natz,
    Si·l bais emblatz    mi fos datz
       O neis autreiatz.
    E no volh que m'enqueiratz
       On es totz mos gratz,
    Que ben leu mal me feiratz.
    Quar soven fai cobeitatz
    Failhir los plus ensenhatz.
     
V   Pos beutatz    fa·ls plus senatz
    Outracujatz,    ben es fatz
       Qui no·s te celatz.
    Mas eu sui si encantatz,
       S'ab mi dons parlatz,
    Que no·m posc moure del latz :
    O eu sui gilos proatz
    O del tot enamoratz.
     
VI   Ab us datz    menutz plombatz
    Nos a trichatz    malvestatz,
       Don escarsetatz
    Nais. En Rainiers, no·us gicatz,
       Que ades no fassatz
    Que pros aitan quan vivatz.
    Que rics hom joves serratz
    Val meins que mortz soterratz.
     
VII      Na Viern', en patz
    Volgra fos Mos Castiatz,
    Qu'en Proensa sui tornatz
    Morir com lebres en jatz.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI