Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,022 Auteur: Peire Vidal Genre: Canso Numero: XXIX

Ges car estius es bels e gens

I	1	Ges car estius    es bels e gens
		No sui jauzens,    qu'us marrimens
		Mi ven de lai,
		Don soli' aver mon cor gai :
	5	Per que pretz pauc abril ni mai,
		Car cela·m torn' en non caler,
		Qui·m sol honrar e car tener.
		E s'eu pert mas bonas chansos,
		Los bels ditz ni·ls avinens sos
	10	Qu'eu solia per amor far,
		No sai de que·m dej' alegrar.
II		Anc natz ni vius    nolh frais covens
		Ni mandamens,    mas quar trop lens
		Tornei en sai,
	15	On seus bels cors sojorn' e jai;
		Don tem que lauzengier savai,
		Qui fan drutz e domnas doler
		E joi baissar e descazer,
		No mi fosson contrarios.
	20	Mas car sui de celar ginhos,
		Degr' esser melhs mos pretz, so·m par ;
		Mas occaizo mi vol trobar.
III		Anc non ac Grius    tan mals talens
		Ni tan cozens    segon parvens,
	25	Com cilh qu'eu sai :
		Per qu'eu n'ai dolor et esmai
		Tal que per pauc los olhs no·m trai,
		Quan la vei, e·m fai si temer,
		Que neis parlar no'lh aus plazer.
	30	Doncs pos que mos plaitz no'lh es bos,
		Remanha com s'anc res no·s fos,
		Qu'eu no la posc de ren forsar
		Mas quan de bendir e d'amar.
IV		Pero dels rius    e de las gens
	35	Ai dig cinc cens   laus avinens
		Per leis que·m fai
		Al peitz que pot, per qu'eu dirai
		No re mas be, qu'eu no poirai.
		E s'eu li pogues mal voler,
	40	Si Deus m'ampar, de mon poder
		Li for'eu mals et orgolhos ;
		Mas no·n posc esser poderos,
		Qu'ab un ris et ab un esgar
		Me fai mi mezeis oblidar.
V	45	Mout m'es esquius    lo parlamens,
		Que·m nafr' e·m vens,    si que mos sens
		Fug e desvai ;
		Ni jamai chanso no farai,
		Que dreg ni razo noca n'ai.
	50	E pos cor no·n ai ni voler,
		Com posc chantar ni joi aver ?
		Que de leis non ai bels respos,
		Ans quan cug dir ditz amoros,
		Ilh fug, que no·m vol escoutar :
	55	Gardatz com m'en dei esforsar !
VI		Mas hom antius    er greu manens,
		Que chauzimens    e mandamens
		Ab cor verai
		Fan fin drut jauzen quan s'eschai.
	60	E qui pren so qu'Amors l'atrai,
		Sitot s'es pauc, ab melhs qu'esper,
		No·i pot falhir qu'a son plazer
		No l'en veilla rics gazardos :
		Per qu'eu lau las honors e·ls dos
	65	E·l col, e·ls mas, que·m fetz baizar
		Cilh que sap perdas restaurar.
VII		Na Vierna, mout m'es amar,
		Car soven no·us posc remirar.
		Senher N'Agout, no·us sai lauzar,
	70	Mas de vos dauri mon chantar.