Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,016 Auteur: Peire Vidal Genre: Canso Numero: XXXIII

De chantar m'era laissatz

I	1	De chantar m'era laissatz
		Per ira e per dolor
		Qu'ai del comte, mon senhor ;
		Mas pos vei qu'al bon rei platz,
	5	Farai tost una chanso,
		Que porten en Arago
		Guilhems e'N Blascols Romeus,
		Si·l sos lor par bos e leus.
II		E s'eu chan com hom forsatz,
	10	Pos mon senhor n'a sabor,
		No tengatz per sordejor
		Mon chan, que·l cors m'es viratz
		De leis on anc non aic pro,
		Que·m gita de sospeisso ;
	15	E·l partirs es mi tan greus
		Que res non o sap mas Deus.
III		Traïtz sui et enganatz
		A lei de bon servidor,
		Quar hom mi ten a folor
	20	So don degr'esser honratz ;
		E n'aten tal gazardo,
		Com cel que ser a felo ;
		Mas s'eu derenan sui seus,
		A meins me tenh que juzeus.
IV	25	A tal domna·m sui donatz
		Que viu de joi e d'amor
		E de pretz e de valor,
		On s'afina si beutatz,
		Com l'aurs en l'arden carbo ;
	30	E quar mes precs li sap bo,
		Be·m par que·l segles es meus
		E que·l reis ten de mi feus.
V		De fin joi sui coronatz
		Sobre tot emperador,
	35	Quar de filha de comtor
		Me sui tant enamoratz,
		Et ai mais d'un pauc cordo
		Que Na Raïmbauda·m do,
		Que·l reis Richartz ab Peiteus
	40	Ni ab Tors ni ab Angeus.
VI		E sitot lop m'appellatz,
		No m'o tenh a dezonor,
		Ni si·m cridan li pastor
		Ni si sui per lor cassatz ;
	45	Et am mais bosc e boisso
		No fauc palaitz ni maizo,
		Et ab joi li er mos treus
		Entre gel e vent e neus.
VII		La Loba ditz que seus so,
	50	Et a·n be dreg e razo,
		Que, per ma fe, melhs sui seus
		Que no sui d'autrui ni meus.
VIII		Bels Sembelis, Saut et So
		Am per vos et Alio ;
	55	E quar la vista·m fo breus,
		En sui sai marritz e greus.